Elordada Ulttyq neırohırýrgııa ortalyǵynyń dárigerleri eki aılyq nárestege mı isigin joıý úshin kúrdeli ota jasady. Qazirgi ýaqytta nárestege otadan keıingi em júrgizilýde, ol anasymen birge palatada, dep habarlaıdy Egemen.kz «Áleýmettik medısınalyq saqtandyrý qory» KEAQ Astana qalasy boıynsha fılıalynyń baspasóz qyzmetine silteme jasap.
Balanyń ata-anasy aýrýdyń alǵashqy belgilerin náresteniń qatty mazasyzdyǵy men sylbyrlyǵynan, álsizdiginen keıin baıqaǵan. Sonymen qatar náresteniń basynyń úlkeıip, eńbeginiń isingeni baıqalady. Osydan keıin balanyń anasy nevropatologqa barady. Ári qaraı dáriger mıdyń neırosonografııasyna jáne KT-ǵa jiberip, onda gıdrosefalııa belgileri, ortasha klınıkalyq dekompensasııa satysynda mıdyń oń jaq qarynshasynyń kólemdi isigi anyqtalady.
Sábıge alǵashqy «Ventrıkýloperıtonealdi shýnttaý» otasy Almaty qalasynyń №2 QBA-da jasaldy. Dárigerler konsılıýmynda ekinshi otany Ulttyq neırohırýrgııa ortalyǵynda jasaý josparlanǵan bolatyn.
Balalar neırohırýrgııasy bólimshesiniń meńgerýshisi Ǵ.I.О́leńbaı atap ótkendeı, otanyń kúrdeliligi, osy jastaǵy bala úshin isik jetkilikti dárejede úlken (4*3 sm.) jáne fýnksıonaldy mańyzdy aımaqta bolǵandyǵynda edi. Sonymen qatar ota kezinde qan joǵaltý qaýpi joǵary, sońy aýyr asqynýlarǵa, tipti ólimge deıin aparýy múmkin boldy. Isik týa bitken jáne náreste qursaqta jatqanda paıda bolǵan, bul sırek kezdesetin qubylys.
«Biz mıkrohırýrgııalyq aralasý júrgizdik, oń jaq qarynshanyń artqy múıiziniń qarynshaishilik isigin alyp tastadyq, bul jerde barlyq zamanaýı ádister qoldanyldy. Sondaı-aq qyzmetkerlerdiń joǵary biliktiligi men bizdiń Ortalyqtyń ota blogynyń zamanýı jabdyqtalýy otanyń sátti aıaqtalýynda mańyzdy ról atqardy. Neırohırýrgııalyq navıgasııalyq júıeniń baqylaýymen biz isikke asa dáldikpen shyǵyp, ony tolyǵymen alyp tastaı aldyq. Qazirgi ýaqytta nárestege otadan keıingi em júrgizilýde, ol anasymen birge palatada», dedi neırohırýrg dáriger Ǵabıt Ilııasuly О́leńbaı.
Anestezıolog dárigerlerdiń de joǵary kásibı deńgeıin atap ótken jón. Mundaı kishkentaı jasta ota árdaıym anestezııa berýdiń úlken qıyndyqtarymen qatar júredi. Qan aınalýyn, tynys alýdy muqııat baqylaý, anestezııany óte muqııat esepteý, balanyń ómiri úshin úlken jaýapkershilik – osynyń bári Neırohırýrgııa ortalyǵynyń kópsalaly komandasynyń moınyna tústi.
Otany joǵary sanatty bilikti neırohırýrg-dáriger, Balalar neırohırýrgııasy bólimshesiniń meńgerýshisi, «UǴO» AQ professory Ǵabıt Ilııasuly О́leńbaı men neırohırýrg-dáriger Saparbek Bazarbaıuly Seıtbekov jasady. Sondaı-aq ota barysynda anestezıolog-reanımatolog dáriger Aıgúl Qaıyrqyzy Jandeldınova, transfýzıolog dáriger Erbol Naǵashpaıuly Qýanyshev jáne ota meıirgeri Mádına Rahmatýllaqyzy qatysty.