Qazir qalamyzda JRVI-men syrqattanýshylyqtyń joǵary deńgeıi tirkelip otyr, dep habarlaıdy Egemen.kz elorda ákimdiginiń resmı saıtyna silteme jasap.
Elordalyq sanıtarlyq-epıdemıologııalyq baqylaý departamentiniń málimetinshe, osy aptada qater tobyndaǵy JRVI juqtyrýdyń, atap aıtqanda 14 jasqa deıingi balalar arasynda 10 myńnan astam jaǵdaı tirkelgen. О́zińizdi jáne balańyzdy tumaýdan qorǵaýdyń 5 erejesi týraly medısına ǵylymdarynyń doktory, ınfeksıonıst-dáriger Dınagúl Baeshova aıtyp berdi.
JRVI jáne tumaý – vırýstyq ınfeksııalar toby. Aýrýdyń qozdyrǵyshtary 300-den asady, olar ártúrli joldarmen taralady.
«Qazir Astanada V tobynyń tumaýy taralýda. Aýrý burynǵyǵa qaraǵanda áldeqaıda aýyr bolyp jatqanyn kórip otyrmyz. Vırýstar ımmýnıtet tapshylyǵy kezdesetin qolaısyz premorbıdti fony bar balalar úshin erekshe qaýip tóndiredi. Premorbıdti fonǵa balalarda týǵannan paıda bolatyn aýrýlardy: ortalyq júıke júıesiniń, asqazan-ishek joldarynyń, ókpeniń jáne basqa aǵzalardyń damý barysyndaǵy aqaýlardy jatqyzamyz», dep atap ótti Dınagúl Baeshova.
Onyń aıtýynsha, osy mezgilde ǵımarat ishinde jáne dalada maska taǵyp júrý óte mańyzdy. Sondaı-aq eger adamda JRVI men tumaý belgileri bolsa alaqanǵa emes, shyntaq býynyna túshkirip, jótelýi kerek. Vırýs tek aýa arqyly ǵana emes, sonymen qatar tyǵyz baılanys arqyly da taralatynyn este ustaǵan jón. Alaqanyńyzǵa túshkirseńiz, ony dereý jýyp, qashyqtyq saqtańyz.
Las qoldy murynǵa, aýyzdyń, kózdiń shyryshty qabyǵyna tıgizbeńiz. Dáriger osyndaı jótel ádebi men qarapaıym tazalyq erejeleri juqpaly aýrýlardyń aldyn alatynyn eskertti.