Elimizde avtomobıl joldarynyń eksplýatasııalyq sıpattamalaryn arttyrý maqsatynda Superpave tehnologııasy paıdalanylatyn bolady. Bul týraly búgin Ortalyq kommýnıkasııalar qyzmetinde ótken brıfıngte málim boldy, dep habarlaıdy Egemen.kz.
Atalǵan tehnologııa týraly IIDM Avtomobıl joldary komıtetiniń tóraǵasy Tólegen Abdýllın aıtyp berdi. Onyń aıtýynsha, jobalaý kezinde ár aımaqtyń klımattyq jaǵdaıy men temperatýrasy ári qozǵalys qarqyndylyǵy eskeriledi. Jańa tehnologııa óz kezeginde eksplýatasııalyq sıpattamalardy arttyrýǵa múmkindik bermek.
«Qazir bizde tek 3 klımattyq aımaq, bıtýmnyń 2 markasy eskeriledi. Al Superpave tehnologııasynda 10-15 klımattyq aımaq qarastyrylady. Árbir óńir úshin asfaltbeton qospalary, bıtým, qıyrshyq tastyń jekelegen quramy qurylady», dedi Tólegen Abdýllın.
Bul jańashyldyq Memleket basshysynyń avtojol salasyn reformalaý tapsyrmasyn oryndaý maqsatynda engizilmek. Sonymen birge Tólegen Abdýllın avtojol jobalaryn EPCM kelisimsharty qaǵıdatyna iske asyrý jáne kóshirý týraly aıtyp berdi. Atalǵan kelisimsharttyń negizgi artyqshylyǵy – onyń quny tehnıkalyq-ekonomıkalyq negizdemege jáne joba-smetalyq qujattamaǵa baılanbaı, irilendirilgen baǵalar boıynsha aıqyndalady.
EPCM kelisimshartynyń qaǵıdaty boıynsha bir oryndaýshy jobanyń tolyq ómirlik sıklin júzege asyrady, ıaǵnı jobalaý satysynan bastap osy ýchaskeni odan ári 10 jyl boıy kútip ustaıdy. Bul rette oryndaýshy jobany iske asyrýdyń barlyq táýekelderin, onyń ishinde qymbattaý boıynsha mindettemelerdi óz moınyna alady.
Budan bólek avtojol kelisimsharttaryna FIDIC halyqaralyq erejeleriniń talaptaryn engizý máselesi pysyqtalýda.