«Qys maýsymyna tehnıkalar saqadaı saı» dep sansyz esepter berilgenimen, qar túsken kúni ombylap qalatynymyz ótirik emes. Kúre joldar kúrelmeı, kóp tehnıka úlgermeı jatqanyn da neshe baıqadyq. Naqtyraq aıtsaq, oblystyń joldaryn qys maýsymynda kútip ustaý úshin 518 tehnıka jumyldyrylǵan eken.
Shyǵys Qazaqstandaǵy avtomobıl joldarynyń jalpy uzyndyǵy 5 265 shaqyrymdy quraıdy. Onyń ishinde 1 238 kılometr respýblıkalyq mańyzy bar kúre jol bolsa, 1 587 shaqyrymy – oblystyq mańyzy bar trassa. Al aýdandyq mańyzy bar joldar 2 440 kılometrdi quraıdy. Myńdaǵan shaqyrym joldy ýaqtyly tazalap ustaý ońaı emes deıin deseń, qar kúreıtin tehnıkalar jetkilikti sekildi. Alaıda Altaıdyń aýa raıy oqtyn-oqtyn borandatyp, burqasyndatyp turady. Jalpy, joldar jaıyn baspasóz brıfınginde jolaýshylar kóligi jáne avtomobıl joldary basqarmasy basshysynyń joldardy damytý máseleleri jónindegi orynbasary Nurbek Turarov aıtyp berdi.
– Oblystyq mańyzy bar joldarǵa «Oblshyǵysjol» JShS qyzmet kórsetedi. Olarda 119 birlik qar tazalaý tehnıkasy bar. О́mesh asýynda, Tarǵyn, Egindibulaq, Uranhaı aýyldarynda 4 jylytý pýnkti bar. Barlyq óndiristik úı-jaılar men jylytý pýnktterin qysqy kezeńge daıyndaý jumystary aıaqtaldy, – dep atap ótti N.Turarov.
Shyǵys Qazaqstan oblysy boıynsha «Qazavtojol» respýblıkalyq mańyzy bar avtomobıl joldaryn paıdalaný bóliminiń bastyǵy Tana Ábdikárimova fılıalda avtomobıl joldaryn qysta kútip ustaý úshin 156 birlik jol-qurylys tehnıkasy bar ekenin aıtty.
– Qajet bolǵan jaǵdaıda 41 tehnıka tartý úshin kelisimsharttar jasaldy. О́ńirde jolaýshylardyń baqylaýynda uzyndyǵy 125 shaqyrym bolatyn 142 qarly ýchaske bar. Bul ýchaskelerde aýa raıynyń qıyn kezeńderinde táýlik boıy patrýldeý uıymdastyrylady. Jolda qandaı da bir oqys jaǵdaılar týyndasa «Qazavtojol» UK AQ-nyń biryńǵaı koll-ortalyǵyna 1403 qysqa nómiri boıynsha, sondaı-aq 26-28-08, 8-777-535-89-08 nómirleri boıynsha dıspetcherlerge qońyraý shala alasyz, – dedi T.Ábdikárimova.
Basa aıta keterligi, 2022-2023 jyldardaǵy qys maýsymynda joldardy kútip ustaý úshin 460 myń lıtr janar-jaǵarmaı qajet. Búgingi tańda onyń 182 myń lıtri daıyndaldy.
N.Turarovtyń aıtýynsha, 1 800 tonna kóktaıǵaqqa qarsy materıaldar daıyndaldy. О́skemen – Tarǵyn – Samar jáne О́skemen – Taýly Úlbi – Severnoe avtojoldarynda kóshkin qaýpi bar 7 ýchaske belgili. Soǵan baılanysty atalǵan ýchaskelerde tótenshe jaǵdaılar oryn ala qalsa, jedel sharalar qabyldaý úshin kómekshi óndiris bazasynda arnaıy jasaq qurylǵan. Osy tusta aıta keterligi, oblystyq mańyzy bar joldarda qandaı da keleńsizdik bolsa, «Oblshyǵysjol» JShS-nyń dıspetcherlik qyzmetine, ıaǵnı, 8-705-798-05-99 nómirine qońyraý shala alasyz.
Iá, qońyraý shalýyn shalady ǵoı, nátıje bolsa... Máselen, 13 qarasha kúni Altaı – О́skemen arasyndaǵy kúre jol ýaqtyly tazartylmady. Jaýǵan qardan kúre jolda kólikterdiń keptelisi oryn alǵan. Qys maýsymyna saqadaı saı bolsa, júrgizýshiler nege narazy?
– 13 qarasha kúni Katonqaraǵaıdan О́skemenge jolǵa shyqtym. Qar jaýatynyn aldyn ala kún raıy boljamyna qarap otyryp, bilip otyrdyq. Borandatqan joq, qylaýlap qana jaýdy. Biraq sonyń ózin kúreı almady ǵoı. Traktorlaryn tizip qoıyp, «kórme» ótkizgennen ne paıda?! Jolymyz kúrelmese, – degen edi júrgizýshi Ashat Qasenov.
Bul ǵana emes, joldardyń ýaqtyly kúrelmeı jatqanyna baılanysty pikir bildirgender kóp. Tipti alǵashqy qar jaýǵan kúnderi О́skemen – Shemonaıha, О́skemen – Rıdder baǵyttarynda jol-kólik oqıǵalary da oryn alyp úlgerdi. Álbette, oqys oqıǵalar júrgizýshilerdiń abaısyzdyǵynan da oryn alýy múmkin. Qalaı desek te, kúre joldarǵa kúrek ýaqtyly tıip tursa eken deımiz.
Brıfıng sońynda spıkerler oblys joldarynda úzdiksiz qaýipsiz jol qozǵalysyn qamtamasyz etý máseleleri turaqty baqylaýda ekenin atap ótti.
Shyǵys Qazaqstan oblysy