Elordada «Halyq Qaharmany» jáne «Qazaqstannyń Eńbek Eri» memlekettik eń joǵary marapat ıeleriniń birlestigi «Táyelsiz qazaqstannyń halyq batyrlary» Respýblıkalyq qoǵamdyq uıymynyń I respýblıkalyq konferensııasy ótti.
Birlestik bıyl maýsym aıynda qurylǵan edi. Parlament depýtattarynyń, memlekettik mekemeler, úkimettik emes uıymdar ókilderiniń qatysýymen ótken konferensııada birlestiktiń tujyrymdamasy bekitildi. Sondaı-aq elimizdiń aımaqtarynda fılıaldar ashý sııaqty máseleler talqylandy. Búginde joǵary dárejeli «Halyq Qaharmany» ataǵynyń 9, «Qazaqstannyń Eńbek Eri» ataǵynyń 35 ıegeri ózderiniń ónegesin ulttyq qundylyqtardy nyǵaıtýǵa jumsap júrgeni qýantady.
Konferensııaǵa Halyq Qaharmany, general-leıtenant Baqytjan Ertaev tóraǵalyq etti. «El astanasynda tuńǵysh ret batyrlar jıyny ótip jatyr. El jastarynyń patrıottyq sezimin, memlekettiń beriktigin nyǵaıtýda uıymnyń yqpaly zor», dedi birlestik tóraǵasy B.Ertaev.
Jıynǵa qatysqan memleket jáne qoǵam qaıratkerleri Oralbaı Ábdikárimuly, Qýanysh Sultanuly, Ahmetjan Smaǵululy, Qaıyrbek Shoshanuly, Uzaqbaı Súleımenuly, Ivan Adamovıch, Muqash Zulqaınaruly uıymnyń qurylýyn joǵary baǵalap, barynsha qoldaý kórsetýge ázir ekenderin jetkizdi.
Jańa birlestiktiń elimizge tanymal 10 quryltaıshysy bar. Olar: Aıdyn Aıymbetov, Serik Aqsholaqov, Muhtar Altynbaev, Abzal Eralıev, Baqytjan Ertaev, Muqash Eskendirov, Aıman Musaqojaeva, Ivan Saýer, Qaırat Úmbetov jáne osy joldardyń avtory.
Bar ómirin halqyna qyzmet etýge arnaǵan, baqytyn elge qyzmet etýden tapqan jandar bolady. Memleket basshysy Qasym-Jomart Toqaev ult ustazy Ahmet Baıtursynulynyń 150 jyldyǵy mereıtoıyna oraı: «Shyn máninde, Aqańnyń ómir joly – ultqa qyzmet etýdiń jarqyn úlgisi» dep aıtqan sózi tarıhı tulǵalarymyzdy ǵana ardaqtaý emes, sonymen birge búginde aramyzda júrgen memlekettik joǵary marapatqa ıe bolǵan azamattardy da úlgi tutyp, qoǵamǵa keń tanytý dep bilemiz.
«Táyelsiz qazaqstannyń halyq batyrlary» qoǵamdyq uıym negizinen «Halyq Qaharmany» jáne «Qazaqstannyń Eńbek Eri» marapaty ıegerlerin nasıhattaý isin bir ortalyqqa biriktirýdi kózdeıdi. Qoǵamdyq birlestiktiń árbir múshesiniń eńbek jolyn, azamattyq beınesin, izgilikti ómir saltyn halyq arasynda keńinen nasıhattaıtyn arnaıy baǵdarlamalar ázirleý kózdelgeni quptarlyq. Olardyń júzege asýyna buqaralyq aqparat quraldaryn, qoǵamdyq jáne memlekettik uıymdaryn keńinen tartý, kitaptar, albomdar, aýdıo-vıdeo quraldar daıyndap, taratý jumystaryn qolǵa alý patrıottyq bastamashylyq dep bilemin.
Marapat ózdiginen kelmeıdi. Qoǵamdyq eńbek jemisin kórsetý quralynyń bir tásili retinde qarastyrǵan jón. Aǵa býynda buǵan qushtarlyq kúshti boldy. Bul rette, el ardaqtylaryn tanytatyn tetikti iske asyrýdyń ýaqyty jetken sııaqty. Jastardy eńbekshil bolýǵa, eńbek erlerine qarap boı túzeýdi, óz eliniń jetistikterine úles qosatyndaı jaǵdaıǵa jetkizýimiz kerek. Mundaı qadam bizdiń tárbıe salasyndaǵy úlken olqylyqtarǵa jol bermes edi.
Memleket basshysy Qasym-Jomart Kemeluly Atyraý oblysy jurtshylyǵymen kezdesýde elimizdegi ardagerler keńesiniń qazaq halqynyń dástúrli ınstıtýty bolyp kelgen aqsaqaldar qaýymdastyǵynyń jalǵasy ekenine nazar aýdardy. Búginde ardagerler keńesi jumysynyń belsendiligin arttyrý qajettiligin aıtty. Prezıdenttiń bul sózi «Táyelsiz qazaqstannyń halyq batyrlary» jumysynyń negizgi arqaýy dep sanaımyn.
Bul rette, ult ustazy Ahmet Baıtursynulynyń: «Alashqa aty shyqqan adamdar! Kósemdikterindi adaspaı túzý isteńder! Sender adassańdar, arttaryńnan Alash adasady, arttarynan ergenderdiń obal-saýaptaryna sender qalasyńdar» degen sózi oıǵa oralady. Áli de ózektiligin joǵaltpaǵan bul sóz qazirgi el aǵalary men analardyń jastarǵa ulttyq, rýhanı-adamgershilik, patrıottyq tálim-tárbıe berý isine úles qosýdy jaýapkershilikpen atqarý kerektigin eske salady.
Eń joǵary marapat ıegeri «Halyq Qaharmany», «Qazaqstannyń Eńbek Eri» degen atyna saı bolýy mindetti. Bul – olardyń memleket aldyndaǵy jaýapkershiligi, azamattyq paryzy.
Ustaz retinde «Táyelsiz qazaqstannyń halyq batyrlary» atty birlestiktiń jas urpaq tárbıesi úshin taptyrmas úlgi ekenin aıta otyryp, atalǵan birlestik músheleriniń eńbek jáne erlik isterin respýblıka mektepterinde keń nasıhattaý jumysyna kóbirek kóńil bólinse eken degen tilegimdi bildiremin.
Aıagúl MIRAZOVA,
Qazaqstannyń Eńbek Eri