«Amanat» partııasynyń Ortalyq apparatynda «Talqylau» dıalog alańynyń kezekti otyrysy ótti. Bul joly partııalyq alańda bas qosqan sarapshylar kezekten tys prezıdent saılaýynyń qorytyndysyn talqyǵa saldy.
Alǵash bolyp sóz alǵandardyń biri Májilis depýtaty Juldyz Súleımenova ótken saılaý qazaqstandyqtardyń saıası mádenıetiniń óskenin aıǵaqtaıtynyn aıtty.
«Bıyl elimizde eki iri saıası oqıǵa: jalpyhalyqtyq referendým jáne prezıdent saılaýy ótti. Eger 2021 jyly parlamenttik saılaýda 7 mıllıonnan astam adam daýys berse, referendýmǵa da, prezıdenttik saılaýǵa da 8 mıllıonnan astam adam qatysty. Bul búgingi tańda qazaqstandyqtardyń memleketimizde bolyp jatqan barlyq saıası úderiske qatysýǵa jáne kóptegen saıası máselede óziniń naqty pikiri bar ekenin, eldiń bolashaǵyna qatysty máselelerdi sheshýde óz daýysynyń mańyzdy ekenin túsinetinin aıǵaqtaıdy», dedi J.Súleımenova.
Al Eýropalyq quqyq jáne adam quqyqtary ınstıtýtynyń dırektory, professor Marat Báshimov saılaý ótkizý kezinde halyqaralyq standarttar tolyǵymen saqtalǵanyn atap ótti. «Halyqtyń erkin bildirý úshin barlyq jaǵdaı jasaldy, túrli qoǵamdyq birlestikter men halyqaralyq uıymdardyń baıqaýshylary esh kedergisiz jumys isteı aldy. Tipti elordada azamattar tirkeýsiz daýys bere alatyn ýchaskeler de iske qosyldy. Aldaǵy parlamenttik saılaýǵa zańnyń ústemdigin qamtamasyz etýdiń negizin qalaǵanymyz óte mańyzdy», dedi professor.
Májilistegi «Amanat» fraksııasynyń múshesi Elnur Beısenbaev qazir Qasym-Jomart Toqaevtyń jaqtastary basqa kandıdattarǵa daýys bergen jáne «barlyǵyna qarsymyn» baǵanyn tańdaǵan saılaýshylardyń pikirin eskerýi mańyzdy dep sanaıdy. «Jalpy, sol 1,5 mıllıonǵa jýyq azamattyń pikiri mindetti túrde eskerilýi qajet. Olar aýyldyq jerlerdi damytý, áıelder quqyǵyn qorǵaý, sybaılas jemqorlyqqa qarsy kúres sekildi túıindi máselelerdiń sheshimin taýyp, saıasattaǵy ózgeristerdi kórgisi keledi», dep atap ótti Májilis depýtaty.
Qoǵamdyq saıasat ınstıtýtynyń dırektory Mádına Nurǵalıevanyń aıtýynsha, jýyrda ótken saılaý azamattardyń bılikke degen kózqarasynyń ózgergenin aıqyndap otyr. «Adamdar bılikti qoljetimsiz dúnıe retinde qabyldaýdy qoıa bastady. Bul – eń aldymen Qasym-Jomart Toqaevtyń bastamasymen qolǵa alynǵan «Halyq únine qulaq asatyn memleket» tujyrymdamasynyń nátıjesi. Tujyrymdama bıliktiń halyqqa jaqyn bolýyn, onymen ortaq dıalog qurýyn kózdeıdi», dedi M.Nurǵalıeva.
Sonymen qatar ol bıyl Qoǵamdyq saıasat ınstıtýty alǵash ret Exit-poll ótkizgenin atap ótti. Onyń aıasynda 74 qala men 242 aýylda 600 saılaý ýchaskesi qamtylyp, 620-dan astam suhbat alýshy men sýpervaızer 75 myńnan astam saılaýshymen saýaldama júrgizgen.
О́z kezeginde, «Amanat» partııasynyń saıası jumys departamentiniń dırektory Rýslan Álishev saılaýdyń eń basty nátıjesi – Qasym-Jomart Toqaevtyń baǵdarlamasy aıasynda jańa azamattyq qoǵam qalyptastyrý ekenine toqtaldy. «Úgit-nasıhat jumysy ashyqtyq, naqtylyq, ádildik, adaldyq syndy qasterli qaǵıdattarǵa quryldy. Úgit-nasıhat naýqanyna qatysqan barsha azamat osy qaǵıdatty basshylyqqa aldy. Biz ondaǵan myń kezdesý ótkizip, qoǵamnyń dıalog pen ózgeriske degen úlken suranysyn baıqadyq», dedi departament basshysy.
Belgili telejúrgizýshi, «Amanat» partııasy Saıası keńesiniń múshesi Maqsat Tolyqbaı moderatorlyq etken dıalog alańynda sarapshylar kezekten tys saılaý qorytyndysy týraly oılaryn ortaǵa salyp, saıası doda júıesindegi sony ózgeristerdiń naqty nátıjelerin atap kórsetti.