Senator Narıman Tóreǵalıevtiń tóraǵalyq etýimen Áleýmettik-mádenı damý jáne ǵylym komıtetinde «Balalardyń hal-ahýaly jáne olardyń quqyqtarynyń qorǵalýy» taqyrybyndaǵy keńeıtilgen otyrys ótti.
Is-shara barysynda bilim berý, damý máseleleri jáne balalardy qorǵaý salasyndaǵy problemalardy keshendi túrde sheshý joldary talqylandy. N.Tóreǵalıev otyrysty asha kelip, elimizdegi balalardyń quqyqtaryn qorǵaý máselelerine eń joǵary deńgeıde erekshe kóńil bólinetinine jınalǵandardyń nazaryn aýdardy.
«Qasym-Jomart Toqaev óziniń «Jańa jaǵdaıdaǵy Qazaqstan: Is-qımyl kezeńi» atty Qazaqstan halqyna Joldaýynda balalardyń qaýipsizdigi men quqyqtaryn qorǵaý máselelerine erekshe nazar aýdarýdy tapsyrdy. Osyǵan baılanysty balalardy qorǵaý úshin densaýlyq saqtaý, bilim berý jáne áleýmettik qoldaý salalarynda naqty sharalar qabyldaý mańyzdy dep sanaımyz», dedi senator.
Kezdesýge qatysýshylar osy saladaǵy problemalardy da muqııat taldap, olardy jan-jaqty sheshý qajettigin talqylady.
«Balalar men jasóspirimderdiń óz-ózine qol salý jaǵdaılary Almaty, Jambyl, Qostanaı jáne Mańǵystaý oblystarynda kóbeıip barady. Balalardy zorlyq-zombylyqtan qorǵaýdyń, sýısıdtiń aldyn alýdyń jáne ár balanyń quqyqtaryn qorǵaýdy qamtamasyz etýdiń keshendi josparynyń qajettiligin talqylaýdy mańyzdy dep sanaımyz. Taǵy bir problema – balalardyń jeke balabaqshadaǵy jaǵdaıy. Jeke balabaqshalarda qyzmet kórsetý sapasyn arttyratyn kez keldi», dedi N.Tóreǵalıev.
Komıtettiń keńeıtilgen otyrysyna Parlament Senaty men Májilisiniń depýtattary, memlekettik organdardyń jáne BUU, IýNISEF, IýNESKO halyqaralyq uıymdarynyń ókilderi qatysty. Sondaı-aq Qazaqstan Respýblıkasynyń Bala quqyqtary jónindegi ýákili Arýjan Saın baıandama jasady. Senatorlar otyrysqa qatysýshylar kótergen máseleler men shyǵarylǵan qorytyndyny tıisti zań jobalaryn qaraý kezinde jáne komıtet jumysy barysynda paıdalanatyn bolady.
Senat komıtetiniń keńeıtilgen otyrysy Bala quqyqtary týraly konvensııanyń qabyldanǵan kúnine oraı ótken bolatyn.