QR Parlamenti Senatynyń depýtattary Fınlıandııa Parlamentiniń depýtattary, parlamentaralyq «Ortalyq Azııamen dostyq tobynyń» músheleri Kımmo Kılıýnen jáne Helı Iаrvınenmen kezdesti, dep jazady Egemen.kz.
Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed óz sózinde Fınlıandııa Qazaqstannyń soltústik Eýropadaǵy jáne jalpy Eýropalyq odaqtaǵy mańyzdy áriptesi bolyp tabylatynyn atap ótti. Oǵan qosa bizdiń elderimiz negizgi halyqaralyq máseleler jónindegi kózqarastary uqsas jáne halyqaralyq uıymdar aıasynda tyǵyz yntymaqtasyp keledi.
Parlament depýtaty sonymen qatar Memleket basshysynyń bastamasy boıynsha júzege asyp jatqan keshendi jáne júıeli ózgerister týraly aıtyp berdi.
«Búgingi tańda júzege asyryp jatqan saıası jáne ekonomıkalyq reformalardy zańnamalyq qamtamasyz etý – Parlament jumysyndaǵy basty basymdyq bolyp tabylady. Senat depýtattary aıdyń basynda adam quqyqtaryn qorǵaý júıesin nyǵaıtýǵa, bılik tarmaqtary arasyndaǵy, sondaı-aq ortalyq pen óńirler arasyndaǵy ókilettikter men jaýapkershiliktiń tepe-teńdigin qamtamasyz etýge baǵyttalǵan birqatar mańyzdy konstıtýsııalyq zańdardy qarady jáne qabyldady. Qabyldanǵan erejeler Májilis pen máslıhattardy qalyptastyrýdyń aralas úlgisin engizý, aýdandar men oblystyq mańyzy bar qalalar ákimderiniń saılaýyn kezeń-kezeńimen engizý úshin quqyqtyq negiz jasady», dedi Muhtar Qul-Muhammed.
Taraptar parlamentaralyq baılanystardy keńeıtýdiń mańyzyn da talqylady. Fınlıandııadan kelgen parlamentshiler eki memleket arasyndaǵy dıplomatııalyq qatynastar ornaǵan sátten bastap 30 jyl ishinde Qazaqstan ózin senimdi saıası jáne ekonomıkalyq áriptes retinde kórsetkenin atap ótti.