«Amanat» partııasynyń músheleri Ekibastuz qalasynyń jylýsyz qalǵan turǵyndaryna gýmanıtarlyq kómek jiberdi. Partııanyń Astana qalasyndaǵy fılıalynan gýmanıtarlyq kómek tıelgen júk kóligi jolǵa shyqty. Amanattyqtar barlyǵy myńnan asa jańa elektr jylytqysh, kórpe, termos jáne taǵy basqa qajetti zattar joldady.
«Partııalyqtar Ekibastuzdaǵy jaǵdaıǵa alańdap otyr. Amanattyqtar Arystaǵy, Maqtaaraldaǵy jáne Áýlıekóldegi oqıǵalar kezinde zardap shekken qazaqstandyqtarǵa kómektesken bolatyn. Bul joly da shet qala almaımyz. Búgin elordadan eń qajetti zattar – jylytqyshtar, kórpeler jóneltiledi. Búginnen qalmaı bul kómek Ekibastuz turǵyndaryna jetkiziledi», dep atap ótti «Amanat» partııasy Astana qalasy fılıalynyń atqarýshy hatshysy Berik Jákenov.
Ekibastuzda volonterler shtaby ashyldy. «Jastar Rýhynyń» belsendileri úı-úıdi aralap jatyr. Mobıldi brıgadalar jalǵyz turyp jatqan zeınetkerler, múgedekter, muqtaj otbasylar týraly aqparat jınaýda. Sondaı-aq partııanyń jastar qanatyndaǵy volonterler apattan qutqarýshy brıgadalarǵa ystyq tamaq uıymdastyrý jumysymen de aınalysyp júr.
Parlament Májilisindegi «Amanat» partııasynyń depýtattyq fraksııasynyń músheleri, ıaǵnı Erlan Saırov, Vera Kım, Artýr Platonov, Janarbek Áshimjan, Aıgúl Nurkına, Dúısenbaı Turǵanov, Anatolıı Boıchın de Ekibastuz qalasynyń turǵyndaryna jedel kómek kórsetip jatyr.