«Amanat» partııasynyń Saıası menedjment akademııasynda Jas saıasatker mektebi ashyldy. Baǵdarlama qatysýshylarynyń aldynda sóz sóılegen partııa hatshysy Dáýlet Káribek joba jastardyń jańa býynyn qalyptastyrýǵa baǵyttalǵanyn atap ótti.
«Árbir jas azamat memleket isine, el isine aralasýy kerek. Memleket basshysy aıtyp ótkendeı, jas qazaqstandyqtar únemi jetilip, jan-jaqty damyp otyrýǵa tıis. Saıası jańǵyrtý isin jalǵastyrý jáne kásibı memlekettik basqarýdy engizý úshin tıisti kadrlardy daıarlaý qajet. Jalpy, elimizdiń qoǵamdyq-saıası ómirindegi jastardyń rólin kúsheıtý – «Amanat» partııasynyń negizgi basymdyqtarynyń biri bolyp sanalady», dedi ol.
Qazaqstannyń barlyq óńirinen konkýrstyq negizde 50 qatysýshy irikteldi. Olar 5 kúndik belsendi oqytý kýrsynan ótedi. Bul – kópshilik aldynda sóz sóıleý, saıası kommýnıkasııa, jobalardy basqarý, kóshbasshylyq boıynsha trenıngter, sondaı-aq Qazaqstannyń qazirgi saıası qurylymy týraly dárister.
«Oqytý blogynan bólek, baǵdarlamada belgili saıasat jáne qoǵam qaıratkerlerimen, ǵalymdarmen, Parlament depýtattarymen kezdesýler qarastyrylǵan. Qatysýshylar el damýyna erekshe úles qosýǵa umtylady. Iriktelgen 50 adam mansabyn joǵarylatýǵa jáne ádiletti Qazaqstan qurýǵa jol ashatyn óz daǵdysyn, bilimi men quzyretin damyta alatynyna senimdimin», dedi partııanyń Saıası menedjment akademııasynyń dırektory Danııar Muqıtanov.