Oqý aǵartý mınıstri óz qatarlastarynyń quqyǵyn qorǵap júrgen belsendi balalardyń daıyndyǵyna tánti boldy, dep habarlaıdy Egemen.kz.
«Kózderi ottaı janyp, jigerlenip turǵan balalar óz jobalary jaıynda aıtyp, balalar quqyǵyn qorǵaýdyń túrli aspektileri boıynsha zertteýlerin usyndy.
Daıyndyq sapasyna qatty tańǵaldym. Sebebi baıandama jasaǵan balanyń barlyǵy óz taqyryptary boıynsha saýaldama júrgizip, ádebıetterdi qaraǵan, taldaý men naqty usynystar daıyndaǵan.
Balalardyń mektepterinde «Oqýǵa qushtar mektep», debattar, mekteptiń ózin-ózi basqarýy sııaqty jobalarymyzdyń júzege asyrylyp jatqanyn estip, qýanyp qaldym. Balalardyń kópshiligi osy jobalarǵa ózderi de qatysady.
Olar kásiptik baǵdar berý, balalardyń qaýipsizdigin qamtamasyz etýdiń qosymsha tetikteri, bala kezdegi jaraqattardyń aldyn alý, ınklıýzıvti bilim berýdi damytý, mektep parlamentteriniń ókilettikterin keńeıtý, balalar úılerine qoldaý kórsetý, arnaıy mektep avtobýstaryn iske qosý, tennıska men kardıgandardy mektep formasyna qosý jáne t.b. boıynsha qyzyqty usynystaryn aıtty», dep jazdy Ashat Aımaǵambetov.
Oqý-aǵartý mınıstri usynystary úshin balalarǵa alǵys aıtyp, tıisti qurylymdyq bólimshelerge osy máselelermen jumys isteýdi tapsyrdy.
«Mundaı kezdesýler balalar men mınıstrlik arasyndaǵy mańyzdy dıalog alańy ekenin atap ótkim keledi. Balalar ókilderin yntymaqtastyqqa, budan da belsendi, bastamashyl bolyp, balalardyń máselelerin sheshýge úles qosýǵa shaqyrdym.
Balalar ókildikteri ınstıtýty oqýshylar arasyndaǵy ózekti máselelerge jedel den qoıý jáne olardy sheshý úshin Oqý-aǵartý mınıstrliginiń bastamasymen qurylǵan bolatyn. Balalardyń quqyqtaryn qamtamasyz etý jónindegi ókilder bilim berý uıymdarynda saılanady», dedi mınıstr.