Jaqsylyq, járdem jáne saýap is – qoǵamnyń berekesi. Osy oraıda Mańǵystaýda bıýdjetten arnaıy aqsha bólinip, az qamtylǵan otbasylarǵa kómek retinde 5 myńnan asa gaz taldaǵysh ornatyldy.
Mamandardyń aıtýynsha, turǵyn úılerde tabıǵı jáne kómirtegi totyǵymen ýlanýdyń aldyn alýdyń bir ádisi – qazandyq qurylǵylarynan gazdyń aǵyp ketýin anyqtaıtyn gaz (taldaǵysh) analızatorlaryn ornatý. Sondyqtan bul jumystardy tótenshe jaǵdaı departamenti jergilikti atqarýshy organdarmen birlesip, 2019 jyldan beri júrgizip keledi, nátıjesinde 2019 jyly – 660, 2020 jyly – 1 749, 2021 jyly 2 917 qurylǵy qoıylǵan.
– Turǵyndar gazdy paıdalaný kezinde qaýipsizdikti saqtaýǵa asa mán berýi qajet. Sonymen qatar arnaıy qurylǵylardy tehnıkalyq qyzmet kórsetý mekemelerinen gazdy paıdalaný jóninde sharttary bolýy kerek. Turǵyndardy salǵyrttyq tanytpaı, árqashan úıindegi gaz jabdyqtaryn tekserip otyrýǵa shaqyramyz. «Qaztransgazaımaq» mekemesi de reıd júrgizip turady, – deıdi Mańǵystaý oblystyq energetıka jáne turǵyn-úı kommýnaldyq sharýashylyǵy basqarmasy basshysynyń orynbasary Nurlan Orynbasarov.
Gaz taldaǵysh halyqtyń áleýmettik osal toptarynyń turǵyn úılerinen basqa, órttiń týyndaýyna barynsha beıim turǵyn úılerge de ornatylady.
«Saqtyqta qorlyq joq» deıdi halyq danalyǵy. Kún salqyndap, úılerdi, nysandardy jylytý maýsymy bastalǵan soń-aq qaýipsizdik, qaýiptiń aldyn alý jumystary da qaýyrt sıpatqa ıe bolady.
– Mańǵystaý oblysy aýmaǵynda bıyl jylytý maýsymy bastalǵaly turǵyn úı sektorynda 12 órt oqıǵasy tirkeldi. О́rttiń saldarynan qaza tapqandar jáne jaraqat alǵandar tirkelgen joq. Turǵyn úı sektoryndaǵy órttiń negizgi sebepteri – gazben jabdyqtaý júıesin paıdalaný talaptarynyń buzylýy. Jyl saıyn barlyq órttiń shamamen 50%-y turǵyn úı sektorynda tirkeledi. Departamentpen turǵyn úı sektorynda profılaktıkalyq jumys júrgizýdiń basty maqsaty – qarttar, múgedekter syndy áleýmettik osal toptardyń, kópbalaly otbasylardyń turǵyn úılerinde órttiń aldyn alý jumystaryn júrgizý jónindegi sharalar keshenin iske asyrý, barlyq múddeli qyzmetter men úkimettik emes sektordy tartý arqyly júıeli tásil paıdalaný, – dedi Mańǵystaý oblystyq TJD bastyǵy Murat Muhanov.
Onyń aıtýynsha, úgit-nasıhat jumystary qorytyndysynda 2 447 úı esepke alynyp, 8 234 azamatqa nusqama berilgen. Aımaqta jyl basynan beri ýly gazben ýlaný faktileri bar. 2 adam qaıtys bolyp, 7 adam zardap shekken. «Qaztransgazaımaq» AQ Mańǵystaý oblystyq óndiristik fılıalynyń dırektory Erkin Jumaǵalıevtiń aıtýynsha, eki jaǵdaıda da qaýipsizdik talaptary saqtalmaǵan.
– Tekserý barysynda gaz mamandarymen kelisim jasamaı, óz betterimen qoldan jasalǵan gaz qurylǵylardy ornatqan. Durys orynǵa qoımaǵan nemese qatelik jibergendiktiń saldarynan keleńsiz oqıǵa oryn aldy. Gaz qondyrarda sertıfıkattalǵan qujattary bar kásibı mamandarǵa júginý kerek, – dedi E.Jumaǵalıev.
Jylý men qaýipsizdik qatar júrgiziletin qajettilik. Turǵyndardyń mańyzdy iste mamandar keńesi men kómegine júgingeni jón bolmaq.
Mańǵystaý oblysy