Memleket basshysynyń tapsyrmasyna sáıkes prokýratýra organdary jýrnalıst Mıhaıl Kozachkovqa qatysty tergeý júrgizý boıynsha birqatar BAQ ókiliniń úndeýinde keltirilgen ýájderdi tekserýge kiristi, dep habarlaıdy Egemen.kz Bas prokýratýranyń baspasóz qyzmetine silteme jasap.
Belgili bolǵandaı, M.V.Kozachkov 2022 jylǵy 18 jeltoqsanda Almaty qalasy jáne Almaty oblysynda jekelegen kásipkerlerdiń múlkin reıderlik jolmen basyp alý faktileri boıynsha uıymdasqan topqa qatysty qylmystyq isti tergeý aıasynda Qarjy monıtorıngi agenttiginiń qyzmetkerlerimen ustalǵan.
Sotqa deıingi tergep-tekserý organy M.V.Kozachkovty osy uıymdasqan topqa qatysty (QR QK-niń 262-babynyń 2-bóligi), reıderlik jasady (QR QK-niń 249-babynyń 3-bóligi), memlekettik qupııalardy zańsyz jınaý jáne taratýmen (QR QK-niń 185-babynyń 3-bóligi) aınalysty degen kúdikke ilindi.
Osyǵan baılanysty M.V.Kozachkovtyń turatyn páterinde tergeý sotynyń sanksııasynyń negizinde kúdiktiniń jubaıynyń, kýágerlerdiń qatysýymen jáne beıne jazbany paıdalaný arqyly tintý júrgizilgen.
Týyndaǵan rezonansty eskere otyryp, 2022 jylǵy 18 jeltoqsanda Qarjy monıtorıngi agenttigi joǵaryda atalǵan prosestik áreketterdi jasaýǵa negiz bolǵan mán-jaılardy dereý jurtshylyqtyń nazaryna usynǵan.
«Qazirgi ýaqytta sotqa deıingi tergep-tekserý amaldary jalǵasýda. Tergeý barysy prokýratýranyń qadaǵalaýynda.
Bul rette M.V.Kozachkovqa qatysty istiń mán-jaıyn jarııalaý kezinde kinásizdik prezýmpsııasy qaǵıdasyn jáne joǵaryda atalǵan tergeý is-áreketinen ýaqtyly qol jetkizýde ony qorǵaýdy qamtamasyz etetin advokattyń kedergi jasaý belgilerin buzý týraly habarlamalarǵa erekshe nazar aýdarylady», delingen habarlamada.
Úndeýdi qaraý nátıjeleri týraly tekserý aıaqtalǵannan keıin jurtshylyqqa habarlanady.