Úkimet otyrysynda Álıhan Smaıylov ákimdikterdiń jalǵan aqparattarynyń sońy jylý elektr ortalyǵyndaǵy apattarǵa ákelgenin aıtty, dep habarlaıdy Egemen.kz.
«Biz qyrkúıek aıynda osy máselege qatysty arnaıy Úkimet otyrysyn ótkizgenbiz. Sol kezde ákimdikter jylý berý maýsymyna saqadaı saımyz, daıynbyz dedi. Ákimder eshqandaı problema joq dep baıandady. Alaıda jalań esep pen jalǵan aqparattyń sońy tarıhta bolmaǵan soraqy jaǵdaıǵa alyp keldi. Eki aıdyń ishinde eki birdeı iri apat boldy. Rıdder men Ekibastuzda. Sonymen birge О́skemen, Rýdnyı, Temirtaý, Semeı, Aqtaý jáne Pavlodar qalalarynyń jylý berý júıesinde de qaýipti jaǵdaılar oryn aldy», dedi Á.Smaıylov.
Premer-Mınıstr jylý berý júıeleri men ınjenerlik jelilerdiń turaqty jumysyn qamtamasyz etý úshin jaǵdaıdy qatań baqylaýda ustaýdy tapsyrdy.
«Shuǵyl sharalardy qabyldaý qajet. Olardy keıinge shegerýge bolmaıdy. Tekserýler bastaldy. О́ńirlerdegi naqty jaǵdaı buǵan deıin berilgen aqparattan da nashar bolyp shyqty. Problemalar jasyrylyp keldi. Bólingen qarjy jetkiliksiz bolǵandyqtan, jańǵyrtý men sapaly jóndeý júrgizilmegen. Stansııalar men jeli ıeleri jetkilikti ınvestısııa salmaǵan. Qaraýsyz jatqan jelilerdiń máselesi de sheshimin tapqan joq. Bizde qys aılary óte qatal. Iаǵnı, apattar buǵan deıin de bolyp turdy. Biraq olar sany jaǵynan da, aýqymy jaǵynan da mundaı bolǵan emes. Baspasóz ben áleýmettik jelidegi shaǵymdarǵa qarańyzdar. Barlyq óńirden myńdaǵan shaǵym bar. Bul bir kúnniń ǵana problemasy emes. Jyldar boıy qordalanyp keldi». Jelilerdiń tehnıkalyq jaǵdaıyn tekserýdi jalǵastyrý kerek», dep atap ótti Úkimet basshysy.
Álıhan Smaıylov Energetıka mınıstrligine elektr stansııalaryn tekserýdi 2023 jyldyń I toqsanynda aıaqtaýdy tapsyrdy.
Bul salada qalyptasqan naqty jaǵdaıdy bilý úshin tekserý jumystary sapaly ári eshqandaı burmalaýsyz, shynaıy júrýi tıis. Kelesi jyldan bastap jylý jelilerin jóndeý boıynsha aýqymdy baǵdarlama bastalady. Birinshi kezekte tozý deńgeıi 70%-ten asyp ketken jylý jelileri aýystyrylady. Mundaı jeliler 1600 km. Ekinshi kezeńde 4 myń kılometrge jýyq jeli jańartylady.