Balalarǵa mektepke deıingi bilim berýdiń qoljetimdiligi máselesi elordada erekshe baqylaýda. Qalada 432 balabaqsha jumys isteıdi. Tárbıelenýshilerdi kóbirek qamtýdy qamtamasyz etý úshin jyl saıyn bilim berý mekemelerindegi oryndar sany artyp keledi. Astana ákiminiń orynbasary Eset Baıken onlaın-brıfıngte osy baǵytta júrgizilip jatqan jumystar týraly aıtyp berdi, dep habarlaıdy Egemen.kz elorda ákimdiginiń resmı saıtyna silteme jasap.
Búgingi tańda Astanada 432 mektepke deıingi mekeme jumys isteıdi. Onyń ishinde 99 memlekettik mekeme, onda 31 464 bala tárbıelenýde. 330-y jekemenshik balabaqsha, onda 26 171 bala oqıdy.
Elordada bir jastan 6 jasqa deıingi balalardy mektepke deıingi tárbıemen jáne oqytýmen qamtý 81% nemese 58 129 adamdy quraıdy.
Ákim orynbasarynyń málimetine sáıkes, qalada mektepke deıingi bilim berý mekemelerindegi oryndardyń sanyn kóbeıtý boıynsha belsendi jumys júrgizilýde. Máselen, 2022 jyly úsh myń oryn quryldy, onyń ishinde:
- 200 oryndyq jekemenshik balabaqshalarda bilim berý qyzmetterin alýshylar (vaýcher) boıynsha derbestendirilgen qarjylandyrýdy eskere otyryp, mektepke deıingi tárbıe men oqytý boıynsha pılottyq joba engizildi;
- 150 oryndyq № 32 «Baldáýren» bóbekjaıyn keńeıtý jumystary bastaldy;
- Jumys istep turǵan balabaqshalarda 320 oryndyq qosymsha toptar ashyldy (№ 71 «Móldir», № 76 «Ádemi», № 53 «Mereı», № 66 «Tolaǵaı», № 93 «Aıgólek», № 27 «Balaýsa»);
- Jaǵalaý turǵyn alabynda 290 oryndyq balabaqsha paıdalanýǵa berildi;
- Jumys istep turǵan 24 mektepke deıingi uıymdarda 219 orynǵa arnalǵan erekshe bilim berý qajettilikteri bar balalarǵa arnalǵan qosymsha ınklıýzıvti toptar ashyldy;
- Bıyl balabaqshalarda barlyq jasqa arnalǵan 1820 oryndyq toptar quryldy.
«Balalardy barynsha qamtý maqsatynda kelesi jyly memlekettik tapsyrys boıynsha balabaqshalarda taǵy 10 myńǵa jýyq qosymsha oryn ashý josparlanýda», dedi Eset Baıken.