Astana men Almatyda «Samuryq-Qazyna» qorynyń ókilderi jańa jyldy onkologııalyq ortalyqta qarsy alatyn balalardy merekemen quttyqtady, dep habarlaıdy Egemen.kz.
Elimizde «Úlkendi sen syılasań, kishi seni syılaıdy. Kishini sen syılasań kisi seni syılaıdy» degen keremet sóz bar. Búgingi kezdesýler osy sóz ben túsiniktiń tereńdigin eske túsirdi.
«Samuryq-Qazyna» AQ kompanııalar toby qaıyrymdylyq qyzmetiniń biryńǵaı operatory – «Samruk-Kazyna Trust» qorynyń bastamasymen uıymdastyrylǵan sharada Astanadaǵy Ana men bala ulttyq ǵylymı ortalyǵy men Almaty qalasyndaǵy Pedıatrııa jáne balalar hırýrgııasy ǵylymı ortalyǵynda ońaltýdan ótip jatqan 310 balaǵa jańajyldyq syılyqtar men sertıfıkattar tartý etildi.
Máselen, búgin Almatydaǵy ortalyqta onkologııalyq aýrýlary bar 155 bala em alyp jatyr. Osy balalarǵa enshiles kompanııalar atynan qordyń Qoǵammen baılanys, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov jańajyldyq sertıfıkattar tabystap, ata-analarymen tildesti.
«Qazir elimizde medısına salasy joǵary deńgeıde. Myqty qural-jabdyqtar bar. Dárigerlerimiz de óte bilikti. Sondyqtan osy synaqtan tez ótip, ómirlerińizde jarqyn kezeńder mol bolsyn!», dedi Ǵıbrat Aýǵanov.
Dál osy kúni Astana qalasynyń Ana men bala ulttyq ǵylymı ortalyǵy da jańajyldyq kóńil-kúıge bólendi. Bul jerde de ońaltýdan ótip jatqan 155 balaǵa arnaıy sertıfıkattar berildi.
Quny 50 000 teńgelik sertıfıkattar arqyly ata-analar balalarymen aqyldasyp, ózderi tańdaǵan kez-kelgen syılyqty «Balalar álemi» dúkender jelisinen satyp ala alady.
Sonymen qatar elordadaǵy psıhologııalyq-pedagogıkalyq túzetý kabınetindegi 500 erekshe bala da syılyqsyz qalmady. «Samruk-Kazyna Trust» qorynyń bas dırektory Alfııa Adıeva jetkinshekterge táttiler jıyntyǵyn úlestirdi.
«Armandar oryndalý kerek. Al biz, eresekter, bul jolda barynsha kúsh salatyn bolamyz. Bári múmkin, tek armandaı bilińder. Barshańa myqty densaýlyq pen ǵajaıypqa degen senim tileımin», dedi Alfııa Adıeva.
Qaıyrymdylyqtyń basym baǵyttary densaýlyq saqtaý, bilim berý, buqaralyq sportty damytý jáne azamattardyń áleýmettik osal toptaryn qoldaýǵa negizdelgen.