Mıkroqarjy salasynda ósim bar

Byltyrdan beri MQU aktıvteri 54,7 paıyzǵa, 997 mlrd teńgege deıin kóbeıdi. Al mıkronesıeniń usynylý kórsetkishi 58 paıyzdy qurady, ıaǵnı 838,3 mlrd teńge. Olardyń bulaı qarqyndy ósýine negizgi sebep – banktermen salystyrǵanda klıent aýdıtorııasynyń aýqymdy bolýy. Bankter kóbine oblys ortalyqtary, qala, ári ketkende aýdanmen shektelse, mıkroqarjy uıymdary shalǵaı eldi mekenderde de qyzmet kórsete beredi. Bul olardyń taralý aýqymyn arttyra túsedi. Degenmen MQU-lardyń kóbi Almaty jáne Jetisý oblystaryna ortaq Almaty qalasynda shoǵyrlanǵan. Ońtústik astanada 116 kompanııa jumys isteıdi. Aqmola oblysy men Astanadaǵy MQU sany 27-ge endi jetken. Árıne, MQU-lar­dyń shalǵaı aýdandar men eldi meken turǵyndary úshin qoljetimdi bolýy sol óńirdegi halyqtyń nesıe rásim­deýge degen múmkindigin ulǵaıtady.

Qanshama MQU-nyń ishinen úsh uıymdy daralap aıtýǵa bolady. Kósh basynda turǵan KMF-tiń el aýmaǵy boıynsha 14 fılıaly men 116 qyzmet kórsetý nysany bar. Odan keıingi orynda – 16 resmı dılerlik ortalyǵy bar «Toıota Faınanshl Servısez Qazaqstan» jáne 116 satylym núktesi bar Solva mıkroqarjy uıymy.

Sońǵy ýaqytta MQU-lar qyzmet kórsetýde sıfrlyq tehnologııalardy belsendi qoldanýǵa kóshti.

Jaqynda Qarjy naryǵyn ret­­teý jáne damytý agenttigi eki qujatty talqylaýǵa usyndy. Birinshiden, jeke tulǵalar úshin mıkrozaımdar bo­­ıyn­sha shekti syıaqyny engizý týra­ly qaýly. Qaryz alýshynyń qaryz júk­te­mesin shekteý maqsatynda 2023 jyl­dyń 1 qań­tarynan bastap 20 paıyz deń­ge­ıinde biryńǵaı nesıe mólsherlemesin bekitý josparlanyp otyr. Qazirgi ta­lapqa sáıkes múlik kepildigimen qam­tamasyz etilgen nesıe boıynsha 20 pa­­ıyzdyq mólsherleme bolsa, kepilsiz nesıe bo­ıynsha mólsherleme – 25 pa­ıyz kóleminde.

Ekinshi, «Mıkroqarjylyq qyz­met máseleleri boıynsha keıbir nor­matıvtik quqyqtyq aktilerge ózge­rister men tolyqtyrýlar engizý týra­ly» qaýly jobasyna sáıkes na­ryq ta­laptaryna birqatar mańyzdy ózge­ris engizilmek. MQU menshik kapıtaly­­­nyń mınımaldy mólsheri 100 mln teńge­­­den 2024 jyldyń basyna deıin birtin­­dep 200 mln teńgege deıin kezeń-kezeńi­men ósedi. MQU qyzmetin paıdalana­tyn qaryz alýshynyń qaryz júkte­mesi koeffısıentin esepteý ádisi de ózgerýi múmkin.

MQU naryǵynda jańa tehno­­­logııa­lardy engizip, klıent úshin servıs­ti jetildirip jatqan kompanııa­lar bar. Tıisinshe, bıznes modelin tek ósim­qorlyq qaǵıdatyna negizdep alǵan al­damshy uıymdar da jeterlik. Son­dyq­tan Mıkroqarjylyq uıymdar qaýym­­dastyǵynyń basshysy Erbol Omarhanov menshik kapı­talynyń ­mı­­­nımaldy mólsherin kóbeıtýdi ­du­rys dep sanaıdy.

«Naryqta óz bıznesin damyta ala­tyn, qarjylyq turǵyda ornyqty kom­panııalar ǵana jumys isteýi kerek. Alaıda qujat jobasynda menshik ka­pıtalynyń mınımaldy mólsheri­nen bólek basqa da ózgerister usynylyp otyr. Ol ózgerister naryqqa tym qat­ty qysym jasap, saldarynan kópte­gen uıym jańa júktemege shydas bere ­almaı qalýy yqtımal», deıdi.

Onyń aıtýynsha, MQU bıznesiniń rentabeldiligi búginde 20 paıyzdan tómen. Sonymen qatar mólsherlemeni 25-ten 20 paıyzǵa deıin tómendetý MQU kiristiligin úshten birine deıin tómendetip tastaıdy deıdi.

Aıta keteıik, bıyl agenttik 600 mln teńge kólemindegi mıkrozaım­dar­dy keshirý týraly sheshim qabyl­dady. Osylaısha, 28 myń qaryz alý­shynyń nesıesi keshirilmek. Qar­jy naryǵyn retteý jáne damytý agent­tigi tóraǵasynyń orynbasary Nurlan Ábdirahmanovtyń aıtýynsha, jyl sońyna deıin 432 myń qaryz alýshynyń 33,1 mlrd teńge kólemindegi qaryzy qaıta qurylymdalady. 107 myń qaryz alýshynyń 0,8 mlrd teńgesi ishi­nara, al 28 myń qaryz alýshynyń 0,6 mlrd teńgesi birjola keshiriledi.

2022 jyldyń 1 qyrkúıegindegi jaǵdaı boıynsha kepilsiz tuty­ný­shylyq mıkrozaım kólemi 416 mlrd teńge boldy.