Jetisý oblysy Aqsý aýdany Jansúgirov aýyldyq mektebinde «Aýyldyq aımaqtardaǵy tirek mektepteriniń áleýetin arttyrý» jobasy tanystyryldy, dep habarlaıdy Egemen.kz.
Atalǵan joba bilim berý sapasyn arttyrýǵa, aýyl mektepterine úzdik pedagogıkalyq tájirıbeler men tıimdi ádistemelerdi transfertteýge jáne tirek mektepterdiń qajetti materıaldyq-tehnıkalyq bazasymen qamtamasyz etýge baǵyttalǵan.
«Búgingi zaman bala tárbıesine de, bilim sapasyna da óz talabyn qoıýda. Kóbine erkindikti qajet etedi. Buryn oqýshy qoıylǵan tapsyrmany tolyǵymen oryndaýy mańyzdy edi. Jańa metodıkada balanyń erkindigine, shyǵarmashylyǵyna, qabiletine qaraı beıimdelýi mańyzdy. Bilim berýdi turaqty damytý qorynyń jáne joba seriktesi «Nazarbaev Zııatkerlik mektebimen» birlesken «Aýyldyq aımaqtarda tirek mektepteriniń áleýetin arttyrý» jobasy aıasynda ótkizgen tájirıbe almasý bizdiń muǵalimderimizdi kóp nársege úıretti. Tipti oqýshy úshin ǵana emes, muǵalimniń ózine de oqý prosesi áldeqaıda tıimdi ári jeńil bola bastady», dedi mektep dırektory Rahat Nyǵmetbekqyzy.
«Aýyldyq aımaqtardaǵy tirek mektepteriniń áleýetin arttyrý» jobasy aıasynda 22 oqý kabıneti men qosymsha bilim berý sheberhanalary jabdyqtalǵan. Pánder men baǵyttar boıynsha oqý kabınetterimen birge qosymsha bilim berý kabınetteri – STEM-zerthana, ART-stýdııa, telestýdııa, oqýshylarǵa arnalǵan kovorkıng aımaǵy bar kitaphana jaraqtandyryldy.
Aıts ketsek, «Qazaqstan halqyna» Qory jabaǵa 249 825 000 teńge bólgen.
Qazirgi ýaqytta mektepte 53 muǵalim jumys istep, 402 bala oqıdy. Qor osylaısha E.Sıqymov atyndaǵy mektep quzyrettilik ortalyǵyna jáne jaqyn mańdaǵy shaǵyn jabdyqtalǵan mektepter úshin tirek mektep atanýy kerek ekenin atap ótti. Materıaldyq-tehnıkalyq bazany nyǵaıtý, ádisnamalyq kómek kórsetý oqýshylar men ustazdardyń tájirıbelik bilimderi men daǵdylaryn arttyrýǵa múmkindik beredi.
«Eń aldymen, Qazaqstan halqynyń basym bóligi aýyldyq jerde turatynyn umytpaýymyz kerek. Sondyqtan aýyl oqýshylary qala balalary sııaqty túrli múmkindikke ıe bolýy kerek. Búginde biz tirek mektepterdi damytýmen aınalysamyz, óıtkeni onsyz aýyl bilimin kóterý tipten múmkin emes. Joba qazir Qazaqstannyń 17 oblysyn qamtıdy, onda 13 000-ǵa jýyq bala oqyp, 2 000-ǵa jýyq muǵalim jumys isteıdi», dep atap ótti Bilim berýdi turaqty damytý qorynyń dırektory Danııar Toqtarbaev.
Bul maqsatqa 4 mlrd 250 mln teńge (1 mektepke 250 mln teńge esebinen) bólingen. Búgingi tańda Aqmola (Qatarkól a., Dosov at.om.), Pavlodar (Ertis a., № 1 Ertis om) Qostanaı (Sarykól a., Ýrıskıı om.), Qaraǵandy (Aqtoǵaı a., K.Baıseıitova at.om.), Abaı (Aıagóz q., Qalalyq kópbeıindi qazaq mektep-gımnazııasy), Ulytaý (Ulytaý a., Ulytaý jalpy bilim beretin OM. №1), Shyǵys Qazaqstan (Marqakól a., №1 om), Jetisý (Jansúgirov a., E.Sıqymov at.om) oblystarynda 8 tirek aýyldyq mektep jaraqtandyrylyp, ustazdarǵa arnalǵan oqýlar ótkizilip jatyr.
Is-shara «Ashyq esik kúnderi» formatynda ótti. Oǵan Parlament Senaty depýtaty Amangeldi Tólemisov, aýyl ákimdigi men belsendi azamattary, buqaralyq aqparat quraldarynyń ókilderi, joba demeýshileri men seriktesteri qatysty.