Senator Álı Bektaev elimizdiń Premer-mınıstriniń atyna joldaǵan depýtattyq saýalynda Torǵaı óńirin damytýdaǵy ózekti máseleler týraly jarııa etti. Onda kólik qatynasynyń nasharlyǵy, ınjenerlik kommýnıkasııanyń ábden tozýy, medısınalyq mekemelerge dárigerlerdiń jetispeıtini jáne t.b. máseleler aıtyldy, dep habarlaıdy Egemen.kz.
Depýtat senatorlardyń Qostanaı oblysyndaǵy Amangeldi jáne Jangeldi aýdandary men Arqalyq qalasyna sapary kezinde azamattar aıtqan ótinishter osy saýalǵa sebep bolǵanyn atap ótti.
Áýe qatynasynyń joqtyǵy, Arqalyq qalasyna deıin ǵana aparatyn temirjoldyń tozýy men eski vagondar jáne avtomobıl joldarynyń keleńsiz jaǵdaıy óńir ekonomıkasynyń damýyna teris áser etetin basty máselelerge jatady. Senator «Astana-Arqalyq-Torǵaı-Yrǵyz-Shalqar» avtojolynyń qurylysyn jedeldetýdi usynyp otyr. Bul óńir ekonomıkasynyń damýyna serpin beredi jáne kórshi aımaqtarmen ózara is-qımyldy óristetýge múmkindik beredi. Senator sonymen qatar óńirdi aýyz sýmen jáne jylýmen qamtamasyz etý deńgeıiniń tómendigin de atap ótti.
«Búgingi tańda sý qubyrynyń tozýy 86,5%, jylý qubyry 87%, elektr jelisi boıynsha 92%, káriz qubyrynyń tozý deńgeıi 92,8%-dy quraıdy. Bir sózben aıtqanda ınjenerlik-kommýnıkasııalyq júıede tótenshe jaǵdaılardyń joǵary deńgeıi qalyptasqan. Sondyqtan Arqalyq qalasy men Amangeldi, Jangeldın aýdandaryndaǵy ınfraqurylym júıesiniń naqty jaǵdaıyn anyqtaý úshin Úkimet tarapynan arnaıy komıssııa shyǵartý qajet», delingen depýtattyq saýalda.
Depýtat sonymen qatar Torǵaı turǵyndarynyń uıaly baılanys pen ınternetke qol jetkize almaı otyrǵany, óńirdi tabıǵı gazben qamtamasyz etýdiń ekonomıkalyq jáne áleýmettik mańyzy, Arqalyq polıtehnıkalyq kolledjiniń moraldyq jáne fızıkalyq turǵydan eskirgen ǵımaraty týraly da aıtty.
«Joǵaryda aıtylǵan problemalardy sheshý úshin Qostanaı oblysynyń Torǵaı óńirin serpindi damytý maqsatynda arnaıy óńirlik baǵdarlama qabyldanyp, qajetti kólemde qarjy bólinip, Úkimet deńgeıinde qoldaý kórsetilýi tıis dep esepteımiz», dedi senator.