Qazaqstannyń Bas prokýrory Berik Asylov elimizdiń burynǵy Qorǵanys mınıstri Murat Bektanov qańtar aıyndaǵy oqıǵalar kezinde zańsyz buıryqtar bergenin málimdedi, dep habarlaıdy Egemen.kz.
Májilistiń jalpy otyrysynda Bas prokýror áskerı sotta eks-mınıstrdiń isi boıynsha tyńdaýlar jalǵasyp jatqanyn habarlady.
«Tergeý tótenshe jaǵdaı kezinde ol zańsyz buıryqtar berip, áskerı strategııalyq nysandardy qorǵaýsyz qaldyrdy dep sanaıdy. Burynǵy Qorǵanys mınıstri elde konstıtýsııalyq tártip ornatý boıynsha sharalar qabyldaǵan joq», dedi Bas prokýror Berik Asylov.
Onyń aıtýynsha, elimizdiń basqa qalalaryna qaraǵanda shabýylshylardyń basym bóligi Almatyda shoǵyrlandy. Olar qorshaýdy buzyp, polısııa men Ulttyq gvardııa kúshterin basyp, halyqty qorqytqan.
«Sondyqtan Murat Bektanovqa bılikti asyra paıdalandy degen aıyp taǵyldy (QR QK 451-baby 3-bóligi). Endi onyń túpkilikti jazasyn sot anyqtaıdy», dep qosty Berik Asylov.