Qazaqstannyń Bas prokýrory Berik Asylov UQK-niń burynǵy basshysy Kárim Másimov 2022 jyldyń 5 qańtarynda UQK departamentteriniń ǵımarattaryn bosatýǵa buıryq bergenin aıtty, dep habarlaıdy Egemen.kz.
Ol tártipsizdikter shyńynda Almaty qalasynyń, Almaty jáne Qyzylorda oblystarynyń UQK departamentteriniń barlyq jeke quramy óz ǵımarattaryn tastap ketkenin atap ótti.
«Tergeý málimetteri boıynsha, 5 qańtarda UQK tóraǵasynyń orynbasary Ánýar Sadyqulovtyń jeke quramnyń ǵımaratty tastap ketýge daıyndyǵy týraly jazbasha nusqaýy kelip tústi. Kárim Másimovtiń nusqaýy boıynsha Almaty jáne Qyzylorda oblysynyń UQKD ǵımarattary bos qaldy. Sondaı-aq basshylyqtyń nusqaýy boıynsha Almaty jáne Jambyl oblystarynyń polısııa departamentteriniń ǵımarattary da bosatyldy. Ashyǵyn aıtsaq, bul basshylar álsizdik tanytty. Nátıjesinde tártipsizdikterdiń jolyn kesý boıynsha ýaqytyly sharalar qabyldanǵan joq», dedi Bas prokýror Berik Asylov.
Onyń aıtýynsha, Almaty men Taldyqorǵan eki táýlik boıy qarýly qylmyskerlerdiń bıliginde boldy. Olardyń qolynda tutas arsenal - 3 myńǵa jýyq avtomat, tapansha, mergendik myltyq jáne ondaǵan myń oq-dári boldy. Qazirgi ýaqytta 2 myńǵa jýyq qarýdyń ornalasqan jeri áli de belgisiz.
«Arnaıy prokýrorlardyń bılikti asyra paıdalaný faktileri boıynsha tergeý aıaqtaldy. UQK úsh óńirlik departamentiniń, Almaty oblysy polısııa departamentiniń jáne basqa da adamdardyń burynǵy basshylaryna qatysty qylmystyq ister sottarǵa joldandy. Olardyń kinálilik dárejesi men jazalaý sharasyn sot anyqtaıdy», dep qorytyndylady B. Asylov.