Májiliste Bas prokýror Berik Asylov Almatyda áskerı kıim kıip, mıtıngke qatysýshylarǵa baǵyt bergen, sapaly baılanys quraldarymen jasaqtalǵandarǵa qatysty túsinikteme berdi, dep habarlaıdy Egemen.kz.
QR Parlamenti Májilisiniń depýtaty Erlan Saırov qańtar oqıǵasy kezinde Almatyda joǵary sapaly baılanys quraldarymen, áskerı kıimmen jabdyqtalǵan qarýly toptar paıda bolǵanyn eske salyp, Berik Asylovqa suraq qoıdy.
«Olar sodyrlardy, qatysýshylardy baqylap otyrdy. Bir top tipti balalar juqpaly aýrýlar dıspanseriniń fılıalyn qorshap alǵan edi. Olar jaǵdaıdy rasııanyń kómegimen baqylap, rettep otyrǵany da anyqtaldy. Biraq keıin olar joǵalyp ketti. Kóptegen azamattar olardy sýretke túsirip te úlgergen. Jalpy, bir jyldyń ishinde olardyń jeke basy anyqtaldy ma? Olardy qarý-jaraqpen, zamanaýı baılanys quraldarymen kim qamtamasyz etti? Bul tekserildi me? Nege bul jaǵdaı jan-jaqty zerttelmeı jatyr?», dedi Parlament Májilisiniń depýtaty Erlan Saırov.
Buǵan jaýap retinde Bas prokýror Berik Asylov bul kúrdeli máselelerdiń biri ekenin aıtty.
«Atalǵan faktiler boıynsha arnaıy tergeý toby qurylyp, olar tıisti sharalardy qolǵa alyp jatyr. Al juqpaly dıspanseriniń fılıalyna keletin bolsaq, bul aýmaqta mundaı adamdar shynymen de júrgen. Ol kúnderi olardy ustaýǵa múmkindik bolmady. Olardyń barlyǵy joǵalyp ketti. Bul adamdar kim ekenin biz áli anyqtaǵan joqpyz», dedi Bas prokýror.Degenmen, Berik Asylov olardyń jeke basy áli de anyqtalatynyn qosa aıtty.
«Olardyń qaıda joǵalǵanyn, kim ekenin áli anyqtaımyz. Bul ýaqytty talap etedi. Búginde jedel-izdestirý sharalary júrgizilip jatyr. Qosymsha aqparat bolsa, árıne habarlaımyz», dep qorytyndylady Berik Asylov.