Arqalyq qalasyndaǵy Dala ólkesi tarıhy oblystyq murajaıynyń qorynda kóptegen sırek kezdesetin kitaptar men Torǵaı óńirinen shyqqan birqatar aqyn-jazýshylardyń qoljazbasy saqtalǵan. Sonyń ishinde belgili aqyn, «qazaq balladasynyń atasy» atanǵan Qaınekeı Jarmaǵambetovtiń birneshe qoljazbasy bar. Bul qundy jádigerdi mýzeı qoryna 1998 jyly aqynnyń jıeni Baqytjamal Qyzjanqyzy tapsyrǵan.
Qaınekeı Jarmaǵambetovti ádebıetsúıer qaýym jaqsy biledi. Aqynnyń alǵashqy týyndylary ekinshi dúnıejúzilik soǵystan buryn merzimdi baspasózde jıi jarııalanyp, keıin «Zaman bizdiki», «Adam týraly ańyz», «Balladalar», «Sońǵy tún» atty birneshe jyr jınaqtary jaryq kórgen. Ásirese aıtýly tulǵanyń qazaq poezııasyndaǵy ballada janrynyń damýyna zor úles qosqanyn erekshe aıtýǵa bolady. Sonymen birge qarymdy qalamger áıgili ánshi Ámire Qashaýbaevtyń ómir jolynan «Ánshi azamat» atty povest jazdy.
Joǵaryda atalǵan murajaı qoryndaǵy aqynnyń qoljazbalary ishinde «Ánshi azamat» povesimen birge «B.Maılın tvorchestvosy» atty ǵylymı zertteýi jáne P.Ershovtiń «Konıok-Gorbýnók» ertegisiniń «Tulpar taı – suńqar taı» atty qazaq tilindegi aýdarmasy saqtalǵan. Sondaı-aq 1938-39 jáne 1942-44 jyldary jazylǵan óleńderi de bar. Bul qoljazbalardyń keıbireýi qalammen jazylsa, endi biri latyn jáne kırıllısada terilip, mashınkaǵa basylǵan.