Advokat Dmıtrıı Kýrıachenko Pavlodar oblysynyń burynǵy polısııa basshysy Nurlan Másimovtiń isi týraly aıtyp berdi, dep habarlaıdy Egemen.kz.
Nurlan Másimovke asa aýyr sybaılas jemqorlyq qylmysyn jasady degen aıyp taǵyldy. Burynǵy polıseıge qatysty is qaralyp jatqan baptardyń sanksııalarynda múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrý arqyly 7 jyldan 15 jylǵa deıin bas bostandyǵynan aıyrý jazasy qarastyrylǵan.
«Sotta Másimovtiń qorǵaýshysy isti qysqartý, isti prokýrorǵa qaıtarý, kepil nemese úıqamaqqa alý bultartpaý sharasyn ózgertý týraly birneshe ótinish bildirdi. Otyrys qorytyndysy boıynsha sýdıa qylmystyq isti prokýratýraǵa qaıtarý týraly sheshim qabyldady», dedi Dmıtrıı Kýrıachenko.
Aıta keteıik, Pavlodar oblysynyń qylmystyq ister jónindegi mamandandyrylǵan aýdanaralyq soty Nurlan Másimov pen onyń orynbasary Damır Sırazıdımovtiń isin prokýratýraǵa qaıtarǵanyn rastady.
Kýrıachenkonyń aıtýynsha, sot Másimovke qatysty bultartpaý sharasyn ózgertý týraly ótinishti qanaǵattandyrmaı, ony qamaýda qaldyrdy.
Eske salaıyq, 2022 jyldyń qańtarynda Nurlan Másimov Pavlodar oblysynyń polısııa bastyǵy qyzmetinen bosatyldy.
О́tken jyldyń sáýir aıynda Nurlan Másimovtiń izdeýde júrgeni belgili boldy. Keıin Sybaılas jemqorlyqqa qarsy qyzmet onyń júrgen jeri týraly aqparat bergenderge syıaqy jarııalady. Shilde aıynda Másimov Reseımen shekarada jalǵan qujattarmen ustaldy.