Astanadaǵy Ulttyq mýzeıdiń tórin toltyryp turǵan bir qundy jádiger bar. Ol – Alash ardaqtysy Mirjaqyp Dýlatulynyń taıjaqysy. Bul jádigerdi aıtýly tulǵanyń qyzy Gúlnár Dýlatova 2009 jyly burynǵy Prezıdent mádenıet ortalyǵyna tapsyrǵan.
Taıjaqy dep taı terisinen tigilgen qaptal tondy aıtady. Bul túrki halyqtarynyń ejelden kele jatqan syrt kıimi sanalady. Mirjaqyp atamyz bul taıjaqyny 1925 jyly Orynbordan Qyzylordaǵa kóship kelgende ulty evreı tiginshige tapsyrys berip tikkizgen. Sodan ony 1928 jyly bir top qazaq zııalylarymen qamaýǵa alynǵanǵa deıin ústinen tastamaı kıip júripti. Odan keıin baǵaly tondy Alash arysynyń jary Ǵaınıjamal Dýlatova 1940 jylǵa deıin eshkimge kórsetpeı, kóziniń qarashyǵyndaı saqtap, qyzy Gúlnárǵa amanat etip qaldyrǵan. Al búgingi urpaqqa ony tektiniń tuıaǵy, marqum Gúlnár Mirjaqypqyzy jetkizdi.
– Ákem qamaýǵa alynǵan 1928 jyldan bastap sanasaq, bizdiń shańyraǵymyzda bul taıjaqy seksen jyl saqtaldy. Osy asyl kıimniń qadirin jas kezimizde onsha bilgen joqpyn. Qazir ákemniń ısi sińgen, rýhy aıalaǵan otbasylyq jádigerimizdi qımaı, bir jaǵynan, muńaıyp ta turǵan jaıym bar. Biraq halqynyń ardaqtysy Mirjaqyptyń taıjaqysy endi el ıgiligine aınalyp, ózi armandaǵan táýelsiz memleketiniń eń mártebeli murajaıynyń tórinen oryn alatynyna qýanyshtymyn, – dep ákesiniń qymbat dúnıesin mýzeıge tapsyrarda Gúlnár apa kózine jas alypty.
Biregeı jádigerdi sol kezdegi Prezıdent mádenıet ortalyǵynyń bas qor saqtaýshysy Bıbinur Sanaqulova qabyldap alyp, Gúlnár apaǵa ortalyq dırektory, belgili ǵalym Myrzataı Joldasbekovtiń alǵyshaty men arnaıy soqtyrǵan kúmis bilezigin syılaǵan. Sondaı-aq kórnekti qaıratkerdiń qyzy mýzeıge ákesiniń Álıhan Bókeıhan, Ahmet Baıtursynuly, Jumaǵalı Tileýlın jáne Muhtar Mýrzınmen jazysqan hattary men qujattaryn, sýretterin tapsyrǵan.
Gúlnár apamyzǵa ákesiniń qadirlep kıgen syrt kıimin mýzeıge ótkizý ońaı bolmaǵanyn myna bir hattan baıqaımyz. 2010 jyly Almatydaǵy «Mektep» baspasynan jaryq kórgen «Alashtyń sónbes juldyzdary» atty kitabynda ol kisi Qazaqstannyń halyq jazýshysy Muhtar Maǵaýınge joldaǵan hatynda sol sáttegi kóńili men tolqynysyn áserli baıandapty.
«Asa qymbatty baýyrym Muhtar!
Ar ma?
22.04.09. Pragadan joldaǵan maqalań qolyma tıisimen bas kótermesten bir demmen oqyp shyqtym. Qatty qýanǵan halimdi aıtyp jetkize almaımyn. Shyn júrekten rızamyn saǵan.
...Bıyl 23.04.09 kúni ótken jańalyqqa kóńil bóleıin: Qadirli ákem Mirjaqyptyń kıgen, qolymda 80 jyl saqtap kelgen taıjaqysyn Myrzataı Joldasbekov basshylyq etetin Astanadaǵy Prezıdenttik mádenı ortalyqqa syılyqqa bergenim. Bul úlken sensasııa boldy. Radıodan berildi, teledıdarǵa túsirildi, «Egemen Qazaqstan» gazetiniń tilshisi keldi, jýrnalıster toby jınaldy. Beretin syılyǵymdy qabyldaý mıssııasymen kelgen mýzeıdiń bas qor saqtaýshysy B.Sanaqulovanyń toltyrǵan aktisine qolymdy qoıyp, M.Dýlatov ákemniń taıjaqysyn tabys ettim. Ol mınýttaǵy keshken halimdi aıtpaı-aq qoıaıyn, jeńil tıgen joq. Biraq meni jubatarlyq áser etken, M.Joldasbekovtiń maǵan jazǵan Alǵyshaty edi. Onda bylaı degen sózderin qysqartyp keltireıin: «Abylaı hannyń altyn zerli qamqa tony, Balýan Sholaqtyń kemer beldigi sekildi qundy muralarmen birge Ortalyq tórinen oryn alyp, ulttyq mádenıetimizdi baıytyp turatyn bolady!...» Aldaǵy ýaqytta Mirjaqyptyń taıjaqysy Abylaı hannyń qamqa tonymen qatar mýzeıdiń tórinde ilýli tursa, budan artyq qandaı qurmet-syı bolýshy edi?! Qýanam. Maqtanam...Qushaqtap súıdim, Gúlnár Mirjaqypqyzy Dýlatova».
Qysqasy, Ulttyq mýzeıdegi baǵaly jádigerler qatarynan oryn alǵan Mirjaqyp Dýlatulynyń taıjaqysy – Alash arysynyń kózi ǵana emes, táýelsizdik muraty jolynda basyn báıgege tikken ardaqtylarymyz ómir súrgen dáýirden syr shertip tur.