Búgin Aqparat jáne qoǵamdyq damý mınıstrliginiń keńeıtilgen alqa otyrysy ótti. Onda aqparat jáne qoǵamdyq damý salasynyń 2022 jylǵy jumysynyń qorytyndysy men aldaǵy josparlary aıtyldy, dep habarlaıdy Egemen.kz.
Otyrysqa QR Premer-mınıstriniń orynbasary Altaı Kólginov, qoǵam jáne memleket qaıratkerleri, BAQ ókilderi, azamattyq qoǵam belsendileri men halyqaralyq uıym basshylary qatysty.
Aqparat jáne qoǵamdyq damý mınıstri Darhan Qydyráli ótken jyldyń negizgi qorytyndylary týraly baıandama jasady.
«Mınıstrlik Memleket basshysy Qasym-Jomart Toqaevtyń saılaýaldy baǵdarlamasyndaǵy negizgi strategııalyq baǵyttar men tapsyrmalardy oryndaý boıynsha júıeli jumystar júrgizip keledi. Naqtyraq aıtqanda, Prezıdenttiń bizdiń mınıstrlikke júktegen 8 tapsyrmasynyń 5-eýi oryndaldy, qalǵandary iske asyrylyp jatyr. Byltyr bizdiń sala boıynsha 20 aýqymdy is-shara ótti. Onyń 8-i álemdik beldi sarapshylardyń, belgili ǵalymdar men saıasatkerlerdiń jáne halyqaralyq uıym ókilderiniń qatysýymen uıymdastyryldy», dedi Darhan Qydyráli.
Etnosaralyq jáne konfessııaaralyq kelisimdi nyǵaıtý – basty maqsattyń biri. Prezıdent tapsyrmasyna oraı Qazaqstan halqy Assambleıasynyń 2022-2026 jyldarǵa arnalǵan damý tujyrymdamasy daıyndaldy. Qazirgi ýaqytta Álemdik jáne dástúrli dinder lıderleri seziniń 2023-2033 jyldarǵa arnalǵan damý tujyrymdamasy ázirlenip jatyr.
Mınıstrlik jetekshilik etetin salalardyń jumysyn ǵylymı tujyrym men zertteý qorytyndylaryna negizdeý úshin otbasy, jastar jáne qoǵamdyq keńester týraly 3 ulttyq baıandama ázirlendi. Memleket basshysynyń tapsyrmasy boıynsha taıaýda «Memlekettik jastar saıasaty týraly» zań qabyldandy.
Halyqaralyq tájirıbelerdi eskere otyryp, «Mass-medıa týraly» zań jurtshylyq talqylaýyna shyǵaryldy. Sondaı-aq onlaın-platformalar men ınternet-jarnamanyń qyzmetin retteıtin jańa zań jobasy ázirlenip jatyr.
О́z kezeginde Altaı Kólginov Memleket basshysy tapsyrmasynyń sapaly oryndalýy asa mańyzdy ekenin atap ótti.
«Memleket basshysy ultaralyq birlik pen konfessııaaralyq kelisimdi nyǵaıtý saıasatyn «Birligimiz – áralýandyqta» jalpyǵa ortaq qaǵıdasy negizinde jalǵastyrýdy tapsyrdy. Eldiń birligi men ultaralyq kelisim máseleleri qashanda basty nazarda. Osyǵan baılanysty mınıstrliktiń aldynda memlekettik organdarmen jáne Qazaqstan halqy Assambleıasymen birlesip, turaqtylyqty saqtaı otyryp, «Birligimiz – áralýandylyqta» qaǵıdaty boıynsha etnosaralyq birlik pen konfessııaaralyq kelisimdi nyǵaıtý boıynsha belsendi sharalardy jalǵastyrý boıynsha úlken mindet tur», dep atap ótti Altaı Seıdiruly.
Sonymen birge Altaı Kólginov: «Volonterlar men volonterlik uıymdardyń jumysy qoǵam men Memleket basshysynyń oń baǵasyn aldy. Qazirgi ýaqytta Qazvolunteer.kz biryńǵaı onlaın platformasy jumys isteıdi, onda búginde 50 myńnan astam volonter, 680 uıym jáne 1000-nan astam joba tirkelgen. Jyl saıyn kem degende 50 jobany júzege asyrý josparlanýda. Bul jumysty burynǵydaı qarqynmen jalǵastyryp, bıyl eriktilerdiń halyqaralyq forýmyn ótkizip, jumystaryńyzdyń nátıjesin kórsetý kerek», - dedi.
Jıyn sońynda qatysýshylar óz oı-pikirlerimen bólisti.