Májilis depýtattary Qazaqstan men О́zbekstan arasyndaǵy bas bostandyǵynan aıyrylǵan adamdardyń jazasyn odan ári óteý úshin bir birine ekstradısııalaý týraly kelisimdi maquldady, dep habarlaıdy Egemen.kz.
Májilistiń jalpy otyrysynda Bas prokýrordyń orynbasary Áset Shyndalıev atap ótkendeı, Qazaqstan men О́zbekstan arasyndaǵy sottalǵandardy bir-birine berý týraly kelisim elimizdiń Konstıtýsııasynda belgilengen talaptardy júzege asyrýǵa baǵyttalǵan.
«Eger eki eldiń kelisimsharty bolmasa, onda Qazaqstan azamatyn shet memleketke berýge bolmaıdy dep jazylǵan. Sonymen qatar, respýblıka óz azamattaryn óz shekarasynan tys jerde qorǵaýǵa jáne qamqorlyqqa alýǵa kepildik beredi. Osyǵan uqsas norma О́zbekstan Konstıtýsııasynda da bar», dedi Áset Shyndalıev.
Onyń aıtýynsha, bul qujatqa qol qoıý boıynsha Qazaqstan men О́zbekstan arasynda birneshe jyl boıy kelissózder júrgizilgen.
«Adam quqyǵy týraly kelisim ne beredi? Jalpy, mundaı jaǵdaılardyń áleýmettik mańyzy zor. Eń aldymen adamgershilik sıpatta bolady. Kóp jaǵdaıda ózge elde jazasyn ótep jatqandar jergilikti halyqtyń tilin, ádet-ǵurpyn bilmeıdi. Týǵan-týys, dostardan alshaq júrgendikten, mundaı adamdy qoǵamǵa beıimdeý ońaı emes ekeni belgili. Sottalǵan adamǵa týystarymen kezdesý jaqsy áser etetini sózsiz», dep túsindirdi Áset Shyndalıev.
Kelisimsharttyń sharttaryna kelsek, sottalǵan adamdy elge jetkizý úshin eń aldymen onyń kelisimi qajet. Adam óz elinde jazasyn óteý nıeti týraly ótinish berýi kerek.
«Máselen, qazirdiń ózinde bizde О́zbekstannyń 225 sottalǵan azamaty óz elinde jazasyn óteýge nıet bildirdi. Ol úshin biz sottalǵandar arasynda arnaıy saýalnama júrgizdik. Al О́zbekstanda sottalǵan 20 Qazaqstan azamaty bar, olar da jazasyn óz elinde óteýge qarsylyǵy joq dep oılaımyz», dep qosty spıker.
Sottalǵandardy ekstradısııalaý talaptaryna toqtalsaq, birinshi kezekte sottalǵan adamnyń azamattyǵy bolýy kerek. Eki el de transferge kelisýi kerek. Eger bul eldiń egemendigi men qaýipsizdigine nuqsan keltiretin bolsa, ulttyq zańnamaǵa qaıshy kelse jáne oǵan qatysty sot nemese tergeý júrip jatqan kezde onyń qarjylyq qaryzdary bolsa, sottalýshy ekstradısııalanýǵa jatpaıdy.