Premer-mınıstr Álıhan Smaıylov pen túriktiń «Gap Inshaat» kompanııasy bas dırektorynyń mindetin atqarýshy Chengel Azız Qazaqstanda jańa ınvestısııalyq jobalardy iske qosý perspektıvalaryn talqylady, dep habarlaıdy Egemen.kz Úkimettiń baspasóz qyzmetine silteme jasap.
Kezdesý barysynda Chengel Azız kompanııa respýblıkadaǵy ınvestısııalaryn keńeıtýge múddeli ekenin jetkizdi. Onyń aıtýynsha, Kókshetaý qalasynda JEO salý jobasynyń bolashaǵy zor.
Premer-mınıstr Túrkııa Respýblıkasy Qazaqstan úshin mańyzdy strategııalyq seriktes ekenin, sondyqtan Úkimet ózara tıimdi jańa jobalardy iske asyrýdy qoldaıtynyn atap ótti.
Bul rette Álıhan Smaıylov Energetıka mınıstrligi Kókshetaýda JEO salý jobasy boıynsha ashyqtyq pen básekelestik qaǵıdattarymen ashyq tender ótkizetinin, oǵan barlyq áleýetti ınvestorlar qatysa alatynyn aıtty.
О́z kezeginde Chengel Azız tenderge qatysýǵa daıyn ekenin málimdedi.
Ázirlengen tehnıkalyq-ekonomıkalyq negizdemege sáıkes, Kókshetaýdaǵy jańa JEO-nyń elektr qýaty 240 MVt, jylý qýaty – 520 Gkal/saǵ. Jobany qarjylandyrý tenderde jeńip shyqqan ınvestordyń qarajaty esebinen júzege asyrylady.