Qyzylordada oblys ákimi Nurlybek Nálibaevtyń tóraǵalyǵymen kadrlyq ózgeristerge baılanysty aktıv otyrysy ótti. Jıynda oblystyq qoǵamdyq damý basqarmasynyń basshysy tanystyryldy.
Qazaqstan Respýblıkasy Prezıdenti Ákimshiligi jáne Qazaqstan Respýblıkasy Memlekettik qyzmet isteri agenttiginiń kelisimderi boıynsha oblys ákiminiń ókimine sáıkes, merıtokratııa qaǵıdatymen oblystyq qoǵamdyq damý basqarmasynyń basshysy laýazymyna Esmahanov Almasbek Ábilqasymuly taǵaıyndaldy.
Oblys ákimi jańa basqarma basshysyn quttyqtap, oǵan aldaǵy ýaqytta atqarylýy tıis mańyzdy mindetterdi tapsyrdy.
Almasbek Esmahanov 1982 jyly týǵan. Qyzylorda gýmanıtarlyq ýnıversıtetin «Qarjy jáne nesıe», Qaztutynýodaǵynyń Qaraǵandy ekonomıkalyq ýnıversıtetin «Zańtaný» mamandyqtary boıynsha bitirgen.
Eńbek jolyn 2006 jyly Qyzylorda qalalyq ekonomıka jáne bıýdjettik josparlaý bóliminiń mamany retinde bastaǵan. 2006-2012 jyldary jergilikti atqarýshy organdarda túrli deńgeıde jaýapty qyzmetterde bolǵan.
2012-2022 jyldar aralyǵynda Qyzylorda qalasy Qaraýyltóbe aýyldyq okrýginiń ákimi, oblys ákimi apparatynyń uıymdastyrý - ınspektorlyq jumys jáne aımaqtyq damý bóliminiń basshysy, Shıeli aýdany ákiminiń orynbasary, Qyzylorda qalasy ákimi apparatynyń, qalalyq mádenıet jáne tilderdi damytý, kásipkerlik, ónerkásip jáne týrızm, ishki saıasat bólimderiniń basshysy qyzmetterin atqarǵan.
2022 jyldyń qyrkúıek aıynan bastap osy kezge deıin Qyzylorda oblysynyń qoǵamdyq damý basqarmasy basshysynyń orynbasary qyzmetin atqaryp keledi.