2022 jyly Qazaqstanda ana men bala óliminiń deńgeıi birshama tómendedi. Qazaqstan Respýblıkasynyń Densaýlyq saqtaý mınıstrligi jańa derekterdi usyndy, dep habarlaıdy Egemen.kz.
Máselen, elimizde júkti áıelderdi prenataldyq baqylaýmen qamtý kúsheıtildi, búginde ol 99,2%-dy qurady, onyń ishinde júkti áıelderdi 12 aptaǵa deıin erte qamtý 5%-ǵa ósip, 89,5%-dy qurady, prenataldyq ýltradybystyq skrınıngpen qamtý 5%-ǵa, bıohımııalyq skrınıngpen qamtý 10%-ǵa ósti, sondaı-aq balalardy 1 jasqa deıin proaktıvti baqylaýmen jáne skrınıngpen qamtý 81%-ǵa deıin ulǵaıdy.
Vedomstvo ókilderi habarlaǵandaı, júkti áıelder men jańa týǵan nárestelerge bilikti medısınalyq kómek kórsetý úshin 18 uryqty saqtaý ortalyǵy uıymdastyryldy, prenataldyq dıagnostıka boıynsha 150-den astam ýltradybystyq maman oqytyldy.
Bir jyldyń ishinde mınıstrlik mamandary analardyń syrqattanýshylyǵy men ólimin tómendetý maqsatynda aýyr jaǵdaıdaǵy júkti, bosanatyn jáne bosanǵan áıelderge kúndelikti monıtorıng júrgizip keldi.
2022 jyly «Ulttyq shuǵyl medısınany úılestirý ortalyǵynyń» resýrstaryn paıdalana otyryp, ǵylymı jáne respýblıkalyq klınıkalardyń professorlarymen jáne jetekshi beıindi mamandarymen birlesip júktilik jáne bosaný aǵymy asqynǵan 910 áıelge 1391 medısınalyq qyzmet kórsetildi. Sanıtarııalyq avıasııamen 200 ushý oryndaldy; 21 áıelge operasııa jasaldy, aýyr jaǵdaıda 180 pasıent oblystyq jáne respýblıkalyq klınıkalarǵa jetkizildi.
Qabyldanǵan sharalardyń nátıjesinde aýyr jaǵdaıdaǵy áıelderdiń 1237 nemese 96%-y qutqaryldy.
Sońǵy 5 jyldyń ishinde elde bala týýdyń ósýi baıqaldy, ol 2021 jyly 446 myń bala dúnıege kelgen kezde eń joǵary deńgeıge jetti, 2022 jyly 412 myń náreste dúnıege keldi.
Neonataldyq hırýrgııanyń damýymen jáne osy tehnologııalardyń óńirlerge aýysýymen týa bitken aqaýlary bar jańa týǵan nárestelerdiń ómir súrý deńgeıi 86%-dy qurady. Ortasha alǵanda, jyl saıyn týa bitken aqaýlary bar 1500 jańa týǵan náreste hırýrgııalyq em alady.
Aıta ketsek, Qazaqstan - Ortalyq Azııada týǵannan bastap kardıohırýrgııalyq operasııalar júrgiziletin jalǵyz memleket.
2022 jyly týa bitken júrek aqaýlary bar balalarǵa 1800-den astam ashyq júrekke operasııa, onyń 75%-y bir jasqa deıingi balalarǵa jasaldy.
Master-klass sheńberinde Germanııa men Túrkııadan sheteldik mamandardy tarta otyryp, kúrdeli aqaýlary bar 24 balaǵa operasııa jasaldy.
Asa aýyr jaǵdaılarda balalardyń ómirin qutqarý úshin Qazaqstanda telemedısınalyq tehnologııalar men medısınalyq avıasııa iske asyryldy.
Sanavıasııanyń 497 ushýy, onyń ishinde jańa týǵan nárestelerge 271 ushý oryndaldy, 1072 balaǵa medısınalyq kómek kórsetildi.
Memleket basshysy Qasym-Jomart Toqaevtyń tapsyrmasyna sáıkes Qazaqstan Respýblıkasynda ana men bala densaýlyǵyn saqtaý jónindegi tujyrymdama bekitiletinin eske sala keteıik.