Tólebı aýdanyndaǵy Sh.Ýálıhanov atyndaǵy №2 jalpy orta mektebiniń 9-synyp oqýshysy Jansultan Tórebek qymyz quıatyn robot qurastyrdy. Oǵan «Asylbek» dep at qoıypty. Arnaıy plastıkalyq kartany jaqyndatsańyz Asylbek sóıleı bastaıdy. Aldymen qymyzdyń shıpaly qasıeti týraly qysqasha maǵlumat beredi. Odan keıin ydysqa shóldi basatyn paıdaly sýsyn quıady.
Ulttyq sýsynymyz qymyzdyń emdik qasıetin nasıhattaı otyryp, robototehnıkanyń múmkindikterin adam ıgiligine paıdalaný maqsatynda oqýshy Jansultan qultemirdi ustazy, ınformatıka pániniń muǵalimi Laýra Jaqsybekovanyń kómegimen jasaǵan. «Robottardyń túrlerine, jumys isteý prınsıpterine qyzyǵamyn. Al mundaı robot qurastyrý ıdeıasy mektebimizde ótken ınformatıka páni aptalyǵynda uıymdastyrylǵan robottar kórmesi kezinde týdy. «Asylbek» robotyn jasaý týraly oıymmen aldymen muǵalimim Laýra apaımen bólistim. Ol ıdeıamdy qoldap, qurastyrýda kómektesetinin aıtty. Meniń robotym oqýshylardyń robototehnıkaǵa degen qyzyǵýshylyǵyn arttyrýmen qatar, emdik qasıetke ıe qymyz arqyly jastardyń arasynda salamatty ómir saltyn dáripteıdi. Ulttyq sýsynymyzdy nasıhattaıtyn bolǵandyqtan, «Asylbektiń» ulttyq kıimde bolǵany durys dep sheshtik», deıdi Jansultan.
Oqýshynyń bul eńbegi ǵylymı jobalar baıqaýynyń aýdandyq jáne oblystyq kezeńderinde júldeli boldy.
Túrkistan oblysy