Qalalyq ákimshilik quqyq buzýshylyq isteri jónindegi mamandandyrylǵan soty Pavlodar oblysy IID burynǵy bastyǵyna qatysty eki isti qarady, dep habarlaıdy Egemen.kz Pavlodarnews.kz saıtyna silteme jasap.
Oǵan bıýdjet qarajatyn tıimsiz josparlaǵan jáne ıgergen degen aıyp taǵyldy.
«2021 jyly departament 18 qyzmettik jylqyǵa jem-shep satyp alýǵa 60,9 mln teńge bólgenin anyqtady. Alaıda ol normany buza otyryp, normadan tys 10,7 mln teńgeni josparlaǵan. Iаǵnı 2022 jyly jem-shópke 13,4 mıllıon teńge bólinse, 8,5 mıllıon teńge normadan artyq qosylǵan. Sotta tıimsiz josparlaý bıýdjet aqshasynyń tıimsiz jumsalýyna ákeldi degen sheshim shyǵardy. Sonymen qatar oblystyq polısııa departamentiniń burynǵy basshysynyń kinási ákimshilik quqyq buzýshylyq týraly hattamalarmen, tekserý aktisimen, tekserý komıssııasynyń materıaldarymen, aıǵaqtarmen jáne sot zerttegen basqa da dáleldemelermen dáleldengen. Sot QR ÁQBtK-niń 234-1 baby boıynsha kinálige ár is boıynsha 214,4 myń teńge aıyppul saldy», dep habarlady sottyń baspasóz qyzmeti.
Sondaı-aq sot Pavlodar oblysy boıynsha tekserý komıssııasyna ákimshilik quqyq buzýshylyq týraly hattama jasaý kezinde prosessýaldyq normalardy buzǵany úshin jeke uıǵarym shyǵardy.
Eske salaıyq, ótken jyldyń shilde aıynda izdeýde júrgen polısııa general-maıory Nurlan Másimov shekaradan ótpek bolǵan kezinde ustalǵan. Sybaılas jemqorlyqqa qatysty qylmystar jasady dep aıyptalyp, oǵan QR ÁQBtK-niń bir baby boıynsha taǵy eki is qozǵaldy. Bıylǵy jyldyń qańtar aıynda polısııa basqarmasynyń eks-basshysyna qatysty ister qaraldy. Pavlodar oblysynyń mamandandyrylǵan ákimshilik sotynyń uıǵarymymen Nurlan Másimov qyzmetinen ýaqytsha shettetildi. Keıin Nurlan Másimovtiń isi Pavlodar qalasynyń qylmystyq ister jónindegi mamandandyrylǵan sotyna qaıtaryldy.