Elordada aqıyq aqyn Muqaǵalı Maqataevtyń týǵan kúnine oraı «Esińe meni alǵaısyń» atty mýzykalyq-poezııalyq keshi ótti. Mándi de taǵylymdy sharany ázirlep, usynǵan – Erkeǵalı Rahmadıev atyndaǵy Memlekettik akademııalyq fılarmonııa.
Ádebıetimizge orasan zor eńbek sińirgen Muqaǵalıdyń óleńderine kóptegen ásem án jazylǵanyn bilemiz. Ásirese Shámshiniń, Nurǵısa Tilendıevtiń shyǵarmalary aqynnyń poezııasymen sátti órilgen ańyz-ánderge aınaldy.
Mýzykalyq-poezııalyq keshte Muqaǵalı Maqataevtyń sózine jazylǵan «Sábı bolǵym keledi», «Jylap qaıttym ómirdiń bazarynan», «Shámshi qaıda?» «Men dep oıla», «Oralyńdar» jáne basqa da ánder oryndaldy.
Áýezdi keshte tanymal óner maıtalmandary – Qazaqstannyń eńbek sińirgen qaıratkerleri Araılym Rahym, Altynaı Jorabaeva, Svetlana Aıtbaeva, «Daryn» memlekettik jastar syılyǵynyń laýreaty Nurbol Balapanov, halyqaralyq, respýblıkalyq baıqaýlar men festıvalderdiń laýreattary Sáýlejan Taǵzııa, Zarına Omarova, Altynshash Muqataeva, Aqbota Qusnadın, Ákimhan Májenov, Muratbek Haırolda, Aıdyn Jumabaı, Áıgerim Oraz, Otan Parasat óner kórsetti. Sonymen qatar fılarmonııa sahnasynda kórermender «Alem» zamanaýı horeografııa baleti (kórkemdik jetekshisi – Baqyt Tájınov) men «Aınalaıyn» balalar horyn tamashalady.