Búginge deıin 61 myń Qazaqstan azamatyna sheteldik kólikterdi zańdastyrýǵa ruqsat berildi, dep habarlaıdy Egemen.kz.
«Sheteldik avtokólikterdi zańdastyrýdyń bastalǵanyna 20 kún ótti. Búgingi tańda 61 myń azamat kólikterin zańdastyrýǵa ruqsat aldy. 25 myń kólik ıesi tıisti qujattary men nómirlerin aldy», dedi QR IIM resmı ókili Shuǵyla Turlybek.
Onyń aıtýynsha, zańdastyrý bıylǵy jyldyń 1 shildesine deıin jalǵasady.
Sondaı-aq Ishki ister mınıstrliginiń resmı ókili polısııanyń kúndelikti qyzmetinde zamanaýı tehnologııalardy keńinen qoldaný ishki ister organdaryna júktelgen negizgi mindetterdiń biri ekenin atap ótti.
«Bul quqyq buzýshylyqtyń aldyn alýǵa da, qylmystardy tezirek ashýǵa da múmkindik beredi», dep atap ótti ol.
2022 jyldyń 1 qyrkúıegine deıin elge ákelingen jáne tirkelmegen avtokólikterdi birjolǵy zańdastyrý Memleket basshysynyń tapsyrmasy boıynsha júzege asyrylady. 23 qańtarda elimizdegi barlyq Mamandandyrylǵan halyqqa qyzmet kórsetý ortalyqtarynda zańdastyrý bastaldy.