Aqpan aıynyń sońyna deıin Qazaqstan boıynsha taǵy tórt ótkizý beketine elektrondy kezek engizilmek. Bul týraly Qazaqstannyń Memlekettik kirister komıtetiniń baspasóz qyzmeti habarlady, dep jazady Egemen.kz.
Elektrondy kezek júıesin «CarGoRuqsat» onlaın brondaý servısin QR QM «Aqparattyq-esepteý ortalyǵy» AQ mamandary jasap shyǵarǵan.
Tórt ótkizý beketiniń ekeýi − Qytaı shekarasyndaǵy «Baqty» (Abaı oblysy) jáne «Maıqapshaǵaı» (ShQO) beketteri. «Baqty» beketindegi «CarGoRuqsat» servısi 15 aqpannan bastap, al «Maıqapshaǵaı» beketinde 20 aqpannan bastap iske qosylady. Buǵan deıin Qazaqstan-Qytaı shekarasyndaǵy «Dostyq», «Nur-Joly» ótkizý beketterinde elektrondy beket engizilgen. Al qalǵan eki beket elimizdiń ońtústik-batysynda ornalasqan. «Temir-Baba» beketinde kezek 22 aqpanda, al «Tájen» beketinde 27 aqpanda engizilmek. Eki ótkizý beketi de Mańǵystaýda ornalasqan. Birinshisi Túrikmenstanmen, al ekinshisi О́zbekstanmen shekarada.
Búginde júıede shamamen kezekti brondaý boıynsha 84 myń operasııa oryndaǵan shamamen 7,5 myń paıdalanýshy tirkelgen.
Mamandardyń aıtýynsha, servıs udaıy jetildirilip otyrady. Jýyq arada ol «Face ID», ıaǵnı adamnyń kelbetin skanerleý arqyly tekserýmen tolyǵyp, sheteldik azamattar úshin tulǵany bank kartasy arqyly rastaý qyzmeti iske qosylady.
«Memlekettik derekter bazasy arqyly tekseristen qazaqstandyq tasymaldaýshylar ótetindikten, bizde sheteldik tasymaldaýshylar boıynsha basqa bazalarmen ıntegrasııa jasalmaǵan. Tıisinshe, aıla-sharǵy jasaý derekteri oryn alǵan. Máselen, birneshe sheteldik kompanııalardyń ókilderi memlekettik nómirlerdi ózgertý, ıaǵnı birinshi jaǵdaıda «syzyqsha» qoıyp, ekinshi ret «bos oryn» qaldyrý sekildi bir nómerdi túrlendirý arqyly kezek alǵan. Osylaısha olar jappaı oryn alyp, osy arqyly óz klıentteriniń kóligin jyljytý múmkindigine ıe bolǵan.
Taldaýlar kórsetkendeı, servıs iske qosylǵaly eki aı ishinde «Dostyq» beketi arqyly shekaradan 1759 kólik quraly ótken, onyń ishinde 1108-i nemese 63 paıyzy osy paıdalanýshylardyń kólikteri.
Paıdalanýshy kelisimshartyn buzǵany úshin bul paıdalanýshylardyń akkaýntty buǵattalǵan. Eger bronda kórsetilgen nómirli fýralar shekaraǵa kelse, olar óte alady, biraq atalǵan paıdalanýshy kezekti ózgertý nemese qandaı da bir brondy jyljytý quqyǵynan aıyrylady.
Eske salsaq, 2022 jylǵy 23 qarashadan bastap Qazaqstan-Qytaı shekarasynyń birneshe beketinde «CarGoRuqsat» elektrondy kezek servısi iske qosylǵan. Servısti memlekettiń júz paıyzdyq qatysýymen, QR Qarjy mınıstrliginiń «Aqparattyq-esepteý ortalyǵy» AQ jasap shyǵarǵan. «CarGoRuqsat» elektrondy servısti engizý bastamasy QR QM Memlekettik kirister komıteti men QR Ulttyq qaýipsizdik komıtetiniń Shekara qyzmetine tıesili. Servıs Qoldau.kz sıfrlyq platformasynda iske qosylǵan jáne paıdalanýshylar úshin tegin.