Bul týraly olımpıadalyq at sporty túrleri boıynsha memlekettik jattyqtyrýshy Amanjol Hasenov onlaın-brıfıngte habarlady, dep jazady Egemen.kz Astana ákimdiginiń resmı saıtyna silteme jasap.
Elordada 26 aqpan kúni «Arǵymaq» konkýrsynan ashyq kýbok ótedi. Jarystyń jalpy júlde qory 12 mıllıon teńgeni quraıdy. Olarǵa 5 marshrýt boıynsha 50-ge jýyq shabandoz qatysady dep kútilip otyr. Jeńimpazdar kýboktarmen, medaldarmen, dıplomdarmen jáne syılyqtarmen marapattalady.
«Atalǵan is-sharanyń maqsaty – salaýatty ómir saltyn nasıhattaý, Astana men Qazaqstan Respýblıkasynda at sportyn nasıhattaý jáne damytý; adamdardy belsendi jáne salaýatty ómir saltyna tartý quraly retinde at sportyna qyzyǵýshylyqty arttyrý jáne perspektıvaly shabandozdar men jylqylardy anyqtaý bolyp sanalady. Sonymen qatar Halyqaralyq áıelder kúnine oraı áıelder konkýrsyn ótkizý josparlanyp otyr. Biz 30-ǵa jýyq shabandoz jarysqa qatysady dep kútip otyrmyz. Jarystyń jalpy júlde qory alty mıllıon teńgeni quraıdy», dedi Hasenov.
Astanada «Naýryz» merekesi qarsańynda ulttyq sport túrleri boıynsha at sporty is-sharalary ótkiziledi.
2023 jylǵy 22 naýryzda «Qazanat» ıppodromynda kókpardan jarystar bastalady, oǵan Astana, Qaraǵandy, Pavlodar, Petropavl, Qostanaı qalalarynyń jáne Aqmola oblysynyń komandalary qatysady, atalǵan is-sharanyń júlde qory 19,5 mln teńgeni quraıdy.
«Jalpy at jarysynyń ózindik ereksheligi men maqsaty bar. Resmı jarystarǵa qatysatyn jylqylardyń densaýlyǵyna qoıylatyn veterınarııalyq talaptar qoldanystaǵy veterınarııalyq zańnamaǵa jáne FEI veterınarııalyq erejelerine sáıkes keledi. Jarysqa kelgen árbir jylqy bıylǵy jáne ótken jylǵy veterınarııalyq óńdeýmen veterınarııalyq pasportpen qamtamasyz etilýi tıis, jylqy ıesinde Qazaqstan Respýblıkasy At sporty federasııasynyń ulttyq sport pasporty bolýy tıis. FEI talaptaryna sáıkes», dep túsindirdi spıker.
Jylqylardyń barlyǵy Qazaqstan Respýblıkasynyń At sporty federasııasynda tirkelýi, ulttyq pasporty bolýy qajet.