Premer-mınıstr Álıhan Smaıylov iri sheteldik kompanııalardyń, dıplomatııalyq korpýs pen ortalyq memlekettik organdardyń jáne «Atameken» UKP ókilderiniń qatysýymen Investısııalyq ahýaldy jaqsartý jónindegi keńestiń kezekti otyrysyn ótkizdi, dep habarlaıdy Egemen.kz Úkimettiń baspasóz qyzmetine silteme jasap.
Álıhan Smaıylov syrtqy syn-qaterlerge qaramastan, 2022 jyldyń qorytyndysy boıynsha Qazaqstan ekonomıkasy oń ósý qarqynyn kórsetip, ınvestısııalyq tartymdylyǵyn saqtap qalǵanyn atap ótti. Atap aıtqanda, ótken jyldyń 9 aıynda respýblıkaǵa tartylǵan tikeleı sheteldik ınvestısııalardyń jalpy kólemi 17,8%-ǵa ósip, $22,1 mlrd-ty qurady.
«Jańa ekonomıkalyq jaǵdaıda QR Úkimeti sheteldik ınvestorlardyń jumysy úshin qolaıly jaǵdaı jasap keledi. Bıznes-jobalarǵa turaqty negizde fıskaldyq jáne fıskaldyq emes jeńildikterdi, sondaı-aq preferensııalardy qamtıtyn jan-jaqty qoldaý kórsetilip otyr», dedi Úkimet basshysy.
Qoldaýdyń jańa quraldary týraly aıta otyryp, Premer-mınıstr Investısııalyq mindettemeler týraly kelisimdi, Jaqsartylǵan modeldik kelisimshartty jáne Investısııalar týraly kelisim jasaý prosesin jeńildetýdi atap kórsetti.
Premer-mınıstrdiń aıtýynsha, Qazaqstannyń ınvestısııalyq tartymdylyǵyn jaqsartýdyń taǵy bir mańyzdy qyry – boljaýǵa bolatyn jáne ashyq salyq saıasaty. Osyǵan baılanysty fıskaldyq retteýdi qaıta qaraý úshin jańa Salyq kodeksi ázirlenip jatyr. Ol salyqtyq baqylaýdy sıfrlandyrýdy, saralanǵan mólsherlemelerge kóshýdi, tehnologııalyq jańǵyrtýdy yntalandyrýdy, arnaýly salyq rejımderin ońaılatýdy kózdeıdi.
Otyrys aıasynda qatysýshylar bıznes úshin ákimshilik kedergilerdi joıý, salyq salýdy jetildirý, jańa tehnologııalardy damytý, jahandyq ekonomıkalyq trendterdiń Qazaqstan ekonomıkasyna áserin talqylady.
Shara qorytyndysy boıynsha Premer-mınıstr Úkimettiń ózara tıimdi yntymaqtastyqty arttyrýǵa baǵyttalǵan pikirtalastarǵa, usynymdarǵa jáne jańa jobalarǵa ashyq ekenin atap ótti.
«Biz Qazaqstannyń ınvestısııalyq klımatyn jaqsartýǵa belsendi túrde qatysyp jatqan sheteldik áriptester men dıplomatııalyq korpýstyń jumysyn joǵary baǵalaımyz. О́z tarapymyzdan keleshegi bar jobalarǵa qajetti qoldaý kórsetýge daıynbyz», dep túıindedi Álıhan Smaıylov.