Astana qalasy dene shynyqtyrý jáne sport basqarmasynyń uıymdastyrýymen elordada dástúrli «Burqasyn-2023» qysqy festıvali ótti.
Is-sharanyń ashylý saltanatyna Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Samat Erǵalıev pen Astana qalasy dene shynyqtyrý jáne sport basqarmasynyń basshysy Samat Jylqybaev qatysyp, jarysqa qatysýshylarǵa sáttilik tiledi.
Prezıdent Qasym-Jomart Toqaev óziniń halyqqa arnaǵan Joldaýynda barlyq jas sanattary arasynda buqaralyq sport túrlerin nasıhattaý qajettigin aıta kelip: «Onyń negizinde biz saý ári sanaly urpaqty, myqty ultty qalyptastyramyz» degen bolatyn. Búgingi tańda osy baǵytta atqarylǵan jumystar az emes. Biz sóz etip otyrǵan jarys ta osy oraıdaǵy is-sharalardyń biri.
Bıyl jıyrma úshinshi márte uıymdastyrylyp otyrǵan qysqy sport festıvaline 1800 qatysýshy tirkelgen-di. Festıvalge qatysýshylar 10 sport túri boıynsha synǵa tústi. Olar: shańǵy jarysy, gir kóterý, armrestlıng, belbeý kúresi, arqan tartý, pımaly hokkeı, qar atý, avtosport, motosport jáne qysqy fýtbol.
Sporttyq is-shara Astana qalasynyń turǵyndary men jastary arasynda buqaralyq sportty damytý, salamatty ómir saltyn nasıhattaý maqsatynda ótkizildi.