Ádilet mınıstrligi «Qazaqstan Respýblıkasynyń Ákimshilik quqyq buzýshylyq týraly Kodeksine ózgerister men tolyqtyrýlar engizý týraly» zań jobasyn ázirledi, dep habarlaıdy Egemen.kz.
Atap aıtqanda, «Belgilengen qozǵalys jyldamdyǵynan asyp ketý» dep atalatyn 592-bapqa ózgerister men tolyqtyrýlar engizildi.
Máselen, kólik quralynyń belgilengen qozǵalys jyldamdyǵyn saǵatyna 40-tan 80 kılometrge deıin arttyrǵany úshin 20 AEK (69 000 teńge) aıyppul qarastyrylǵan.
Al qozǵalys jyldamdyǵyn saǵatyna 80 jáne odan da kóp km-ge arttyrǵan júrgizýshige 40 AEK (138 000 teńge) aıyppul salynady.
Bir jyl ishinde jyldamdyqty 80 km/saǵ jáne odan artyq arttyrǵan júrgizýshiler 60 AEK (207 000 teńge) mólsherinde aıyppul tóleıdi.
Sondaı-aq «Jolaýshylar men júkterdi tasymaldaý, jol qozǵalysy erejelerinde kózdelgen qaýipsizdik beldikterin nemese motoshlemderdi paıdalaný jónindegi talaptardy saqtamaý» boıynsha 593-bapqa da ózgerister engizildi.
Onda jolaýshylardy avtokólik kabınasynan tys jerde tasymaldaǵany úshin, sondaı-aq olardy kólik quralynyń tereze oıyqtary men lıýkterine ilip qoıýǵa, esikterdi ashyp qoıýǵa, qozǵalys kezinde basqa da osyndaı áreketter jasaǵany úshin jazalaýdy kózdeıtin jańa tarmaq paıda boldy.
Bul áreketter úshin 10 AEK (34 500 teńge) kóleminde aıyppul salyndy.
Zań jobasyna engen barlyq tolyqtyrýlar 13 naýryzǵa deıin Ashyq NQA saıtynda ornalastyrylǵan.