23 aqpan kúni Batys Qazaqstan oblysynda Mı-8 tikushaǵy apatqa ushyrap, tórt adam qaza tapty. Osyǵan baılanysty QR Avıasııa ákimshiliginiń bas dırektory Katalın Radý Operasııalyq ortalyqtyń shuǵyl otyrysyn ótkizdi, dep habarlaıdy Egemen.kz.
Azamattyq avıasııa komıtetiniń resmı málimdemesine sáıkes, otyrysqa ushýǵa jaramdylyq, ushýdy paıdalaný, aeronavıgasııa, lısenzııalaý, avıasııa medısınasy, izdestirý-qutqarý jáne ushý qaýipsizdigi departamentteriniń ókilderi qatysty.
«Áýe oqıǵasy bolǵan Mı-8 áýe kemesiniń ushýǵa jaramdylyq sertıfıkaty 2022 jylǵy 03 mamyrda berildi. Tikushaq 2021 jylǵy 27 qańtarda shyǵarylǵan. Qazaqstan Respýblıkasynyń Azamattyq áýe kemeleriniń memlekettik tiziliminde 2022 jylǵy 14 sáýirde tirkelgen (kýálik nómiri 1273, áýe kemesiniń memlekettik jáne tirkeý taný belgisi UP-MI874)», dep habarlady QGA baspasóz qyzmeti.
Sondaı-aq Qazaqstannyń avıasııalyq ákimshiligi Mı-8 ushaqtaryn paıdalanatyn avıakompanııalardyń qyzmetine jospardan tys tekserý júrgizetini aıtyldy.
«Tekserýler nátıjeleri boıynsha júıeli buzýshylyqtar anyqtalǵan jaǵdaıda ushý qaýipsizdiginiń barlyq máseleleri sheshilgenge deıin tıisti sertıfıkattar men kýálikter toqtatylady», delingen habarlamada.