Japonııa osy aıdyń basynda joıqyn jer silkinisinen zardap shekken Túrkııa men Sırııaǵa 27 mıllıon dollarǵa jýyq tótenshe gýmanıtarlyq kómek kórsetedi, dep habarlaıdy Egemen.kz.
Japonııa Túrkııa men Sırııadaǵy jer silkinisinen zardap shekkenderge baspana, azyq-túlik jáne basqa da qajetti zattardy halyqaralyq agenttikter arqyly qamtamasyz etý úshin 16 mıllıon AQSh dollary kóleminde shuǵyl kómek kórsetedi. Bul týraly mınıstrler kabınetiniń bas hatshysy Hırokazý Masýno baspasóz máslıhatynda aıtty.
Sondaı-aq Tokıo japondyq úkimettik emes uıym arqyly eki elge qoldaý kórsetý úshin 4 mıllıon AQSh dollaryn bóledi. Sırııaǵa halyqaralyq qaýymdastyqtyń granttaryn baǵyttaıtyn trasttyq qorǵa shamamen 7 mıllıon AQSh dollaryn beredi.
Japonııa úkimeti jer silkinisinen qıraǵan aımaqtardy qalpyna keltirý úshin Túrkııa men Sırııaǵa gýmanıtarlyq kómek kórsetýdi jalǵastyra beredi.
Túrkııa men Sırııa bıliginiń málimetinshe, eki elde jer silkinisi saldarynan qaza tapqandar sany 50 myńnan asty.