Memleket basshysy «QazaqGaz» UK» AQ basqarma tóraǵasy Sanjar Jarkeshovti qabyldady, dep habarlaıdy Egemen.kz Aqordaǵa silteme jasap.
Sanjar Jarkeshov ulttyq kompanııanyń 2022 jyly atqarǵan jumystarynyń qorytyndysy, aldaǵy kezeńge arnalǵan jospary men gaz salasy strategııasyn damytý týraly esep berdi. Sondaı-aq gaz salasyndaǵy reformalardy júzege asyrý jónindegi usynystaryn jetkizdi.
Sonymen qatar halyqty tabıǵı gazben úzdiksiz qamtamasyz etý úshin qabyldanyp jatqan sharalar týraly baıandady.
Qazaqstanda 2022-2023 jyldardaǵy jylytý maýsymynda buryn-sońdy bolmaǵan kóp mólsherde gaz paıdalanylǵanyn habarlady.
Qashaǵan ken ornyndaǵy gaz óńdeý zaýyty qurylysynyń barysy týraly málimet berdi. «QazaqGaz» kompanııasy Almatydaǵy jylý elektr ortalyǵyna gaz qubyryn tartý, Beıneý – Jańaózen gaz qubyrynyń ekinshi jelisin salý, Maqat – Soltústik Kavkaz gaz qubyryn keńeıtý jáne basqa da mańyzdy ınvestısııalyq jobalardy júzege asyryp jatyr.
Ulttyq kompanııanyń resýrs bazasyn ulǵaıtý jáne geologııalyq barlaý baǵdarlamasyn júzege asyrý úshin júrgizip jatqan belsendi jumysy týraly baıandady.
Shyǵyndardy ońtaılandyrý nátıjesinde byltyr ulttyq kompanııanyń qaryzy 26 paıyzǵa azaıǵanyn aıtty.
Prezıdent gaz salasynyń ınvestısııalyq tartymdylyǵyn arttyrý úshin reformany jalǵastyrýdy tapsyrdy.