Jýyrda Energetıka vıse-mınıstri Ashat Hasenov Qyzylorda oblysyna úshkúndik jumys sapary barysynda oblys ákiminiń birinshi orynbasary Serik Qojanııazovpen birge «Baıken-U» JShS ýran óndirýshi kásipornyna baryp, ýrandy óndirý men óńdeýdiń tolyq sıklimen, onyń ishinde affınaj zaýytynyń jumysymen jáne aýysymdaǵy jumysshylardyń eńbek, turmys jaǵdaıymen tanysty.
Jalpy jer qoınaýyn paıda-lanýshynyń jumysyna oń baǵa berilip, óńirdiń áleýmettik-ekonomıkalyq damýyna qosqan úlesi atap ótildi.
Sondaı-aq jumys sapary aıasynda «Qazatomónerkásip» UAK» AQ jáne onyń Qyzylorda oblysynda ornalasqan enshiles kásiporyndarynyń qatysýymen olardyń qazirgi qyzmeti máseleleri boıynsha jumys keńesi ótti.
Keńes qorytyndysy boıynsha Energetıka mınıstrligine ýran ken oryndaryn ıgerýdi damytý baǵdarlamasynyń tujyrymdamalaryn jáne ken oryndaryna irgeles aýmaqtarda ýrandy barlaý josparlaryn usyný, sondaı-aq ken oryndarynda ýran óndirý kezeńin uzartý máselesin pysyqtaý tapsyryldy.
Sol kúni tústen keıin «QazMunaıGaz» UK» AQ, «QazaqGaz» UK» AQ jáne óńirdegi kómirsýtekter salasyndaǵy jer qoınaýyn paıdalanýshylarymen jumys kezdesýi ótti.
«QazMunaıGaz» UK» AQ-ǵa Torǵaı-Paleozoı ýchaskesinde uńǵymany burǵylaý boıynsha jumysty jedeldetý usynyldy. «QazaqGaz» UK» AQ-ǵa jáne «Qazgermunaı» BK» JShS-ǵa Ońtústik Aqsaı ken ornyn jedel paıdalanýǵa berý jóninde sharalar qabyldaý tapsyryldy.
Keshe vıse-mınıstr óńir turǵyndarymen jáne kommersııalyq emes uıymdarmen kezdesip, azamattarǵa jeke qabyldaýlar ótkizip, jumys saparynyń qorytyndysy boıynsha buqaralyq aqparat quraldarynyń ókilderine brıfıng uıymdastyrdy.