Premer-mınıstr Álıhan Smaıylovtyń tóraǵalyǵymen ótken otandyq kásipkerler keńesiniń otyrysynda munaı-gaz salasyn damytýdyń ózekti máseleleri men josparlary talqylandy, dep habarlaıdy Egemen.kz Úkimettiń baspasóz qyzmetine silteme jasap.
Táýelsizdik alǵannan beri elimizde munaı men gaz kondensatyn óndirý kólemi úsh jarym eseden astamǵa, ıaǵnı jylyna 25 mln tonnadan 90 mln tonnaǵa deıin ósti.
OPEK derekteri boıynsha, Qazaqstan búginde munaıdy TOP-10 eksporttaýshynyń qataryna kiredi.
Geologııalyq barlaýǵa qosymsha ınvestısııalar tartý úshin kómirsýtekterdi, onyń ishinde gazdy barlaý jáne óndirý jónindegi kúrdeli jobalar úshin retteýshilik jáne fıskaldyq preferensııalar paketin kózdeıtin Jaqsartylǵan modeldik kelisimshart engizildi. 2023 jyly ınvestısııa kólemi $6 mlrd bolatyn osyndaı alǵashqy kelisimshartqa qol qoıyldy. Investısııalyq quny shamamen $2 mlrd quraıtyn taǵy bir kelisimshartqa qol qoıý pysyqtalýda.
Budan basqa, salada elektrondyq aýksıondar ótkizýdi ońaılatý jóninde sharalar qabyldandy. Bıyl ken oryndaryn jyldam qoldanysqa berý úshin jer qoınaýyn paıdalaný salasyndaǵy rásimderdi jeńildetý jumystary jalǵasady.
Munaı-gaz hımııasy ónerkásibi munaı-gaz sektoryn shıkizattyq baǵyttan qosylǵan quny joǵary ónim shyǵarýǵa qaıta baǵdarlaý sheńberinde belsendi damyp keledi.
Atap aıtqanda, ótken jyldyń sońynda qýattylyǵy 500 myń tonna polıpropılen óndiretin álemdik deńgeıdegi iri munaı-hımııa zaýytynyń biri iske qosyldy. Ol respýblıkanyń ishki qajettiligin tolyǵymen jabýǵa múmkindik beredi.
Qosymsha $12 mlrd ınvestısııa somasyna polıetılen, býtadıen jáne polıetılentereftalat óndirý boıynsha taǵy tórt iri joba iske asyrylyp otyr.
Premer-mınıstr munaı-gaz salasynyń qarqyndy damýy búkil ekonomıka úshin mańyzdy úderis ekenin atap ótti. Osyǵan baılanysty ol qosymsha ınvestısııalar tartý úshin Jaqsartylǵan modeldik kelisimshartty qoldanýdy jedeldetý jáne bızneske ákimshilik qysymdy tómendetý boıynsha jumysty jalǵastyrý qajettigin jetkizdi.
«Jaqyn arada munaı-gaz salasy boıynsha 800-ge jýyq túrli artyq talaptardy qysqartý josparlanyp otyr. Bul sharalar bıznes-qoǵamdastyqpen jáne «Atameken» Ulttyq palatasymen tyǵyz baılanysta qabyldanýda. Úkimet budan ári de osyndaı syndarly negizde jumys isteýge daıyn», dedi Premer-mınıstr.