Syr dıqandary egis naýqanyna daıyndyqtyń qamyna kirisip ketti. Sanaýly kúnderden keıin vegetasııa kezeńindegi sý lımıti anyqtalyp, soǵan sáıkes egis kólemi naqtylanady. Aldyn ala jasalǵan jospar boıynsha bıyl 195,6 myń gektarǵa aýyl sharýashylyǵy daqyldary egilmek. Munyń ishindegi kúrish kólemi – 83,9 myń gektar. Qalǵany dándi, maıly, mal azyqtyq daqyldar. Sondaı-aq qant qyzylshasy, kartop, kókónis egiledi.
Jospar boıynsha byltyrmen salystyrǵanda egis – 7000, mal azyqtyq daqyldar sebiler alqap – 2,3 myń, kartop, kókónis, baqsha kólemi 222 gektarǵa ulǵaıtylmaq. Odan bólek, azyq-túlik qaýipsizdigin qamtamasyz etý úshin jergilikti turǵyndardyń kartop, kókónis, baqsha ónimderin egýine 3 myń gektar jer daıyndalady.
Biraq jyldan-jylǵa qıyndap kele jatqan sý tapshylyǵy «Úıdegi kóńildi bazardaǵy baǵa buzadynyń» kerin keltirip otyr. 2022 jylmen salystyrǵanda álhamshúkir, «Shardara» sý qoımasy men «Kóksaraı» sý rettegishinde osy kúni 6,6 mlrd tekshe metr sý jınalyp tur. Bul ótken jyldyń osy kezeńindegi kólemnen 2,3 mlrd tekshe metrge artyq.
«Qazir «Shardara» sý qoımasyna joǵarydan 1000 tekshe metr sý túsip tur. Biraq bul jaz boıy osylaı bola beredi degen sóz emes. Sondyqtan únemdi paıdalanýǵa tyrysamyz. Osy jyly jańbyrlatyp, tamshylatyp sýarý arqyly 1,5 myń gektarǵa aýyl sharýashylyǵy daqyldaryn egý josparda bar. Byltyrǵy vegetasııalyq kezeńde 17,7 myń gektar kúrishke sý jetkizý ońaı bolǵan joq. Ásirese sý deńgeıinen bıik 8 800 gektar alqapqa bıyl da kúrish sebilse, sharýashylyqtar qosymsha 102 nasos qoıýy qajet», deıdi oblystyq aýyl sharýashylyǵy jáne jer qatynastary basqarmasy basshysynyń orynbasary Qaıratbek Sársenbaev.
Kúrish, basqa da daqyldar tuqymynan tapshylyq joq. Jalpy, kóktemgi naýqanǵa 19,8 mlrd teńge qajet. Bul qarjynyń deni ınvestorlar men sharýa qojalyqtary esebinen jumsalady.
Byltyr kóktemgi naýqanda mıneraldy tyńaıtqysh ta taptyrmaı, baǵasy aspandap ketken edi. Bıyl qajetti 61,2 myń tonnanyń 53,2 paıyzy jetkizildi. Basqarma aımaqqa qajetti mıneraldyq tyńaıtqyshtyń aılar bólinisindegi kestesin jasap, «Qazfosfat», «Qazazot» zaýyttaryna joldady. Basqarma málimetinshe, qazir «Jan-Araı» JShS qoımasynda 670 tonna «Ammofos» tyńaıtqyshy bar. Egis naýqanyna qajetti 3979 tehnıkanyń 75 paıyzy jóndeýden ótken.
Kóktemgi dala jumystary úshin 12,1 myń tonna arzandatylǵan dızel otyny qarastyrylyp otyr. Jergilikti operatorlar arqyly aqpan aıyna belgilengen 7,5 myń tonnanyń qarjysy tolyq tólendi.
Egisti ártaraptandyrý baǵytyndaǵy bastama aıasynda bıyl kartop, kókónis, baqsha kólemin 222 gektarǵa ulǵaıtý kózdelip otyr. Basqarma basshysynyń orynbasary osy ónimdi ótkizý joldary da qarastyrylyp otyrǵanyn jetkizdi.
«Bul ónimderdi óndiristik maqsatta ekken jaǵdaıda sýbsıdııa máselesin qozǵaýymyzǵa bolady. Al ázirge biz satyp alý jóninde «Baıqońyr» ÁKK» AQ-men kelisim jasap jatyrmyz. Osyǵan deıin Shıeli aýdanyndaǵy Bestam, Jaqaev, Botabaı aýyldary, Syrdarııa aýdanyndaǵy Besaryq eldi mekenderi gektarlap kartop egip kelgen. Beınettenip ekkenińnen bazardaǵy arzan bolǵan soń, bul kásipti toqtatqandar naryqtaǵy baǵa kóterilgen soń, qaıta bastaýǵa nıettenip otyr», deıdi ol.
Qyzylorda