Kóktem kelisimen, dala alqaptary, taý bókterinde qaýlap ósetin báısheshektiń gúldeýin qazaq dalasy ár kez jaqsylyqtyń, qýanyshtyń nyshany dep qabyldaıdy. Almatydaǵy Botanıkalyq baqta báısheshek gúldep, qala jurtshylyǵynyń nazary tabıǵattyń osy erekshe bir sátine aýdy.
Botanıkalyq baq Joǵary satyly ósimdikter florasy zerthanasynyń jetekshi ǵylymı qyzmetkeri, bıologııa ǵylymdarynyń kandıdaty Aıjamal Shormanovanyń aıtýynsha, óziniń ádemi gúlderimen erekshelenetin Alataý báıshesheginiń bıiktigi 10-30 sm bolyp keledi. Qyzyl kitapqa kirgen ósimdiktiń bul túrli erekshe qorǵaýdy qajet etedi. Búginde gúl ósirýshiler men ǵalymdar úshin úlken mańyzǵa ıe Alataý báısheshegi elimizdiń Jońǵar, Ile Alataýy, Ketpen, Teriskeı, Qyrǵyz jáne Talas, Syrdarııa Qarataýynda kezdesedi. Báısheshek erte kóktemde, ıaǵnı aqpan aıynyń sońynda, naýryzdyń basynda gúldeıdi.
Báısheshektiń latynsha ataýy – «krokýs». Gúldi-sándik ósimdikterdi ıntrodýksııalaý zerthanasynyń meńgerýshisi Eskendir Satekov antropogendi áserlerdiń saldarynan, ıaǵnı qurylys qarqyndaǵan, mal jaıylǵan, ken óndirilgen aımaqtarda báısheshektiń joıylyp ketý qaýpi zor ekenin aıtady. Ǵalymnyń aıtýynsha, elimizde báısheshekpen qatar erte kóktemde gúldeıtin kesselrıng lapyzy, Qarataý krokýsy, taǵy da basqa dala gúlderi bar. Olardy sándik úshin de, dárilik maqsatta da paıdalanýǵa bolady. Erte kóktemde qar astynan qaýlap shyǵatyn báısheshek elimizdiń ońtústik óńirlerine tán.