Reseıdiń Kýzbass aımaǵynda «Azııa balalary» dep atalatyn halyqaralyq qysqy oıyndar jalǵasyp jatyr. Keshe Qazaqstan quramasynyń qorjyny taǵy eki júldemen tolyqty.
Kóktemniń alǵashqy kúni otandyq short-trek sheberleri qýantqan edi. 1000 metrlik saıysta Meıirjan Tólegen bas júldeni oljalady. Onyń nátıjesi – 1.30:623 sekýnd. Ekinshi oryndy Madır Madıhov ıelendi. Kúmis júldegerdiń kórsetkishi – 1.32:608 sekýnd. Keshe shańǵymen tramplınnen sekirýshilerdiń komandalyq saıysynda Ilıa Mızernyh pen Sofıa Shıshkına kúmis medaldy moınyna ilse, Ilıa Shılnıkov pen Alena Svırıdenko qolaǵa qol sozdy. Bul básekede jerlesterimiz tek Kýzbass quramasynan qalyp qoıdy.
Jalpykomandalyq esepte máskeýlikter kósh basynda keledi. Olar 13 altyn, 4 kúmis jáne 10 qolany oljalady. Ekinshi jáne úshinshi oryndardy Sibir federaldyq okrýgi (9+9+5) men Oral federaldyq okrýginiń (6+6+5) jas órenderi ıelenýde. Qorjynynda 11 júldesi (2+4+5) bar Qazaqstan quramasy ázirge úzdik bestikti túıindep tur.