Memleket basshysy Shymkent qalasynda О́zbekstan Prezıdenti Shavkat Mırzııoevpen beıresmı kezdesý ótkizdi, dep habarlaıdy Egemen.kz Aqordanyń baspasóz qyzmetine silteme jasap.
Qazaqstan men О́zbekstan prezıdentteri eki el arasyndaǵy odaqtastyq qatynastardyń qazirgi jaǵdaıyn jáne ony nyǵaıtý perspektıvalaryn ózara senim, dostyq jáne tatý kórshilik rýhynda qarastyrdy.
Taraptar Qasym-Jomart Toqaevtyń byltyr jeltoqsan aıynda Tashkentke jasaǵan memlekettik saparynyń qorytyndysy boıynsha qol jetkizilgen ýaǵdalastyqtardyń júzege asyrylý barysyn talqylady.
Eki el basshylary saýda-ekonomıkalyq yntymaqtastyq máselelerine erekshe nazar aýdardy. Atap aıtqanda, ózara taýar aınalymyn arttyrý, ınvestısııa tartý, ónerkásip, energetıka, aýyl sharýashylyǵy, kólik jáne logıstıka salalaryndaǵy qarym-qatynastardy damytý perspektıvalary týraly sóz boldy.
Sonymen qatar Qasym-Jomart Toqaev pen Shavkat Mırzııoev óńirlik kún tártibindegi ózekti máseleler jóninde pikir almasty.