Jelide Ulytaýdaǵy shahtalardyń biriniń aýmaǵynda jumysshyny uryp-soǵý sátiniń vıdeosy tarady, dep habarlaıdy Egemen.kz.
Vıdeodan belgisiz eki er adam ǵımarattyń dálizinde bir er adamdy uryp-soǵyp jatqanyn kórýge bolady. Vıdeonyń sıpattamasynda oqıǵanyń Ulytaý óńirindegi shahtalardyń birinde bolǵany aıtylǵan.
«Uryp jatqandar Jezqazǵan qalasynyń uıymdasqan qylmystyq tobynyń músheleri. Qara kıimdi jigit kadr bóliminiń qyzmetkeri. Ol bulardyń jumysqa kelmeı-aq jalaqy alýyna kelispeı tur. Sondyqtan soqqy jedi», delingen habarlamada.
Polıseıler áleýmettik jelilerdi baqylaý kezinde osy vıdeoǵa tap bolǵanyn aıtady.
«Bul janjal Ulytaý aýdanyndaǵy shahtalardyń biriniń aýmaǵynda bolǵany anyqtaldy. Bul derek «Buzaqylyq» baby boıynsha tirkeldi, eki kúdikti ustalyp, ýaqytsha ustaý ızolıatoryna qamaldy. Qazirgi ýaqytta tergeý sharalary júrgizilip jatyr», delingen PD taratqan habarlamada.