Kezdesýde L.Gýmılev atyndaǵy Eýrazııa ulttyq ýnıversıtetiniń Zamanaýı zertteýler ınstıtýtynyń dırektory, saıası ǵylymdar doktory, professor Muhıt-Ardager Sydyqnazarov Prezıdentke óziniń «Qazaqstannyń úzilissiz memlekettiligi tarıh tolqynynda. XVI-XIX ǵasyrlardaǵy eýropalyq jáne amerıkalyq kartalardaǵy Qazaq memleketi» atty jańa eńbegi týraly baıandady, dep habarlaıdy Egemen.kz Aqordanyń baspasóz qyzmetine silteme jasap.
Onyń aıtýynsha, 1465 jyly Qazaq handyǵy qurylǵan kezden beri memleket ataýy Batys elderiniń ozyq kartografııalyq baspalarynan shyqqan atlas kartalarynan qalys qalyp kórmegen. Olardyń arasynda Amerıka Qurama Shtattary, Belgııa, Anglııa, Fransııa, Italııa, Germanııa jáne basqa da memleketterde basylǵan kartalar bar. Atalǵan eńbekte memlekettigimiz anyq kórsetilgen jáne orta ǵasyrlardan, ıaǵnı 1562 jyldan bastap 1879 jylǵa deıingi kezeń qamtylǵan. Barlyǵy – 130 karta. Avtor kitaptyń Belgııa baspasynan shyǵýyn belgııalyq, nıderlandyq kartograftar Qazaq memlekettiligin alǵashqylardyń biri bolyp kartaǵa túsirýmen baılanystyrady.
Qasym-Jomart Toqaev Muhıt-Ardager Sydyqnazarovtyń eńbegine joǵary baǵa berip, elimizdiń barlyq óńirinde jáne halyqaralyq is-sharalarda arnaıy kórmeler uıymdastyrý qajet ekenin aıtty.